ខេត្តមណ្ឌលគិរី ៖ មន្រ្តីជាន់ខ្ពស់ក្រសួងសុខាភិបាលបានស្នើឱ្យអាជ្ញាធរត្រូវស្វែងរកដំណោះស្រាយ ដើម្បីធ្វើយ៉ាងណាឱ្យប្រជាពលរដ្ឋក្នុងមូលដ្ឋានទាំងអស់ ឱ្យទទួលបានការចាក់វ៉ាក់សាំងដែលអាចឱ្យពួកគាត់មានវ៉ាក់សាំងក្នុងការការពារខ្លួនពីការឆ្លងជំងឺកូវីដ-១៩។

ថ្លែងក្នុងពិធីប្រកាសបិទបញ្ចប់យុទ្ធនាការចាក់វ៉ាក់សាំងបង្ការជំងឺកូវីដ-១៩ ជុំទី១ ជូនប្រជាពលរដ្ឋអាយុពី ១៨ឆ្នាំ ដោយមានការអញ្ជើញចូលរួមពីសំណាក់ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត ឯកឧត្តម ស្វាយ សំអ៊ាង អភិបាលខេត្តមណ្ឌលគិរី រួមទាំងកងកម្លាំងប្រដាប់អាវុធ មន្រ្តីរាជការ និងអាជ្ញាធរស្រុកជាច្រើនរូប ដែលប្រព្រឹត្តទៅនៅវិទ្យាល័យអូររាំង ក្នុងខេត្តមណ្ឌលគិរី នាថ្ងៃទី២៩ ខែកញ្ញា ឆ្នាំ២០២១។

លោកជំទាវ ឱ វណ្ណឌីន រដ្ឋលេខាធិការក្រសួងសុខាភិ បាល និងជាប្រធានគណៈកម្ម ការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេសបានឱ្យដឹងថា បច្ចុប្បន្ននេះដំណើរការចាក់វ៉ាក់សាំងជូនប្រជាពលរដ្ឋ មានវឌ្ឍនភាពគួរជាទីមោទន ខណៈដែលខេត្តមួយចំនួន បានបិទបញ្ចប់នូវយុទ្ធនាការចាក់វ៉ាក់សាំងកូវីដ១៩រួចទៅហើយ។

លោកជំទាវបន្តថា ជាមួយនឹងការជិតឈានទៅសម្រេចគោលដៅចាក់វ៉ាក់សំាងនេះ ក៏នៅមានសេសសល់ប្រជាពលរដ្ឋមួយចំនួន ដែលមិនទាន់បានចាក់វ៉ាក់សាំង ដូចនេះ គ.វ.ក-១៩ ក៏បានជំរុញឱ្យរដ្ឋបាលថ្នាក់ក្រោមជាតិ ត្រូវរិះរកគ្រប់មធ្យោបាយក្នុងការចុះទៅចាក់វ៉ាក់សាំង ឱ្យប្រជាពលរដ្ឋបានគ្រប់គ្នានៅក្នុងមូលដ្ឋាន នៅទូទាំងខេត្ត ដើម្បីបង្កើតភាពស៉ុំានៅសហគមន៍ រួមទាំងកាត់បន្ថយការឆ្លងរាលដាលនៃជំងឺដ៏កាចសាហាវនេះ។

លោកជំទាវ បានបន្តទៀតថា ចំពោះប្រជាពលរដ្ឋមួយចំនួន ដែលគាត់រស់នៅក្នុងតំបន់ដាច់ស្រយាលពិបាកក្នុងការធ្វើដំណើរមកទទួលចាក់វ៉ាក់សាំងកូវីដ-១៩នេះ អាជ្ញាធរមូលដ្ឋានរួមទាំងមន្ត្រីពាក់ព័ន្ធទាំងអស់ ត្រូវជួយសម្រួលក្នុងការដឹកជញ្ជូនវ៉ាក់សាំងនេះទៅចាក់ជូនពួកគាត់ដល់ក្នុងសហគមន៍តែម្តង ដើម្បីឱ្យពួកគាត់អាចទទួលបានវ៉ាក់សាំងគ្រប់ៗគ្នាតាមការកំណត់របស់រាជរដ្ឋាភិបាល៕