រដ្ឋបាលខេត្តព្រះសីហនុ រៀបចំទីតាំង ២កន្លែង សម្រាប់យកវត្ថុសំណាកដើម្បីរកមេរោគកូវីដ១៩
ខេត្តព្រះសីហនុ ៖ រដ្ឋបាលខេត្តព្រះសីហនុ នៅថ្ងៃទី៣០ ខែកញ្ញា ឆ្នាំ២០២១នេះ បានចេញសេចក្ដីជូនដំណឹង ដោយបញ្ជាក់អំពីការរៀបចំទីតាំងចំនួន២កន្លែង សម្រាប់យកវត្ថុសំណាក ពីបងប្អូនប្រជាជនទូទៅ ដើម្បីវិភាគរកមេរោគកូវីដ-១៩ នៅរៀងរាល់ម៉ោងធ្វើការ។
ដើម្បីធានាឲ្យការបើកដំណើរការឡើងវិញ នូវសេដ្ឋកិច្ច សង្គម ធានាដល់ប្រក្រតីភាព នៃជីវភាពរស់នៅរបស់ប្រជាជន ក៏ដូចជារក្សានិរន្តរភាព នៃការបើក សាលារៀនឡើងវិញ សម្រាប់កូនចៅប្រជាពលរដ្ឋទូទៅ បានសិក្សារៀនសូត្រ ជាធម្មតានៅតាមសាលារៀន ការបើកឡើងវិញ នូវសកម្មភាពលក់ដូរនៅតាមទីផ្សារនានា ការបើកឡើងវិញនូវការងារ មុខរបរមួយចំនួន -ល- គឺជាការចាំបាច់ដែលខានមិនបាន។
ដើម្បីធានាទប់ស្កាត់ ការចម្លងមេរោគដ៏សាហាវនេះ នៅក្នុងសហគមន៍ បន្ទាប់ពីបានចាក់វ៉ាក់សាំងហើយ ត្រូវយកចិត្តទុកដាក់អនុវត្ត ឲ្យបានត្រឹមត្រូវ តាមវិធានសុខាភិបាល និងអនុវត្ត ឲ្យបានខ្ជាប់ខ្ជួននូវវិធានការ «៣ការពារ និង៣កុំ» ស្របតាមការអំពាវនាវរបស់ សម្តេច តេជោ នាយករដ្ឋមន្ត្រីនៃកម្ពុជា ព្រមទាំងត្រូវចេះពិនិត្យ តាមដានសុខភាពផ្ទាល់ខ្លួន និងសុខភាពសមាជិកក្រុមគ្រួសារ យើងជាប្រចាំផងដែរ។
បច្ចុប្បន្ននេះ រដ្ឋបាលខេត្តបានរៀបចំទីតាំងចំនួន២ សម្រាប់យកវត្ថុសំណាកពីបងប្អូនប្រជាជនទូទៅ ដើម្បីវិភាគរកមេរោគកូវីដ-១៩ នៅរៀងរាល់ម៉ោងធ្វើការ (រួមទាំងថ្ងៃឈប់សម្រាកផង) គឺទីតាំងទី១ នៅមន្ទីរសុខាភិបាលខេត្តព្រះសីហនុ ភូមិ៤ សង្កាត់លេខ៤ ក្រុងព្រះសីហនុ និងទីតាំងទី២ នៅវេទិកា ៧មករា ភូមិ១ សង្កាត់លេខ៣ ក្រុងព្រះសីហនុ៕
