ទឹកជំនន់នៅខេត្តបន្ទាយមានជ័យ ៖ លិចស្រុកក្រុងចំនួន៩ ប៉ះពាល់ពលរដ្ឋជាង១ម៉ឺនគ្រួសារ និងជាង១០០០គ្រួសារជម្លៀសទៅទួលសុវត្ថិភាព
ខេត្តបន្ទាយមានជ័យ ៖ យោងតាមទិន្នន័យរបស់រដ្ឋបាលខេត្ត និងលេខាធិការដ្ឋានគណៈកម្មាធិការ គ្រប់គ្រងគ្រោះមហន្តរាយខេត្តបានឲ្យដឹងថា គិតមកដល់ថ្ងៃទី៣០ ខែកញ្ញា ឆ្នាំ២០២១ ស្រុកក្រុងចំនួន៩ របស់ខេត្តបន្ទាយមានជ័យ បានរងផលប៉ះពាល់ដោយសារជំនន់ទឹកភ្លៀង និងទឹកហូរពីប្រទេសថៃ ធ្វើឱ្យប៉ះពាល់ប្រជាដល់ពលរដ្ឋជាង១ម៉ឺន ខណៈជាង១ពាន់គ្រួសារ ត្រូវបានជម្លៀសទៅទួលសុវត្ថិភាព ព្រមទាំងបង្កផលប៉ពាល់ដំណាំ និងហេដ្ឋារចនាសម្ព័ន្ធមួយចំនួនផងដែរ។
របាយការណ៍បានបញ្ជាក់ថា គិតពីថ្ងៃទី២០ ដល់ដល់ត្រឹមល្ងាចថ្ងៃទី៣០ ខែកញ្ញា ឆ្នាំ២០២១ ទឹកជំនន់ទឹកភ្លៀង និងទឹកហូរមកពីប្រទេសថៃ ប៉ះពាល់ក្រុងស្រុកចំនួន៩រួមមាន ៖ ស្រុកមង្គលបូរី, ក្រុងសិរីសោភ័ណ, ស្រុកអូរជ្រៅ, ក្រុងប៉ោយប៉ែត, ស្រុកម៉ាឡៃ, ស្រុកភ្នំស្រុក, ស្រុកព្រះនេត្រព្រះ, ស្រុកស្វាយចេក និងស្រុកថ្មពួក។ ក្នុងនោះ ប៉ះពាល់មានឃុំ-សង្កាត់ចំនួន៣៨ ក្នុងស្រុក ក្រុងទាំង៩ ប្រជាពលរដ្ឋរងគ្រោះមាន ១៨,៧១៥គ្រួសារ, ប៉ះពាល់ខ្នងផ្ទះ មនុស្ស៧៩,៨២៨នាក់ ស្រី៤០,៥២៩នាក់ និងជម្លៀសទៅទួលសុវត្ថិភាព ១,១៥០គ្រួសារ កើនជាង ២៣៤គ្រួសារ មនុស្ស ៤,១០០នាក់ កើនលើសមានចំនួន ១,០៨៥នាក់ ស្ត្រី១,៩២៧នាក់ កើន២៦៨នាក់ និងកុមារ១,១៨៨នាក់ កើន២៧១នាក់»។
ទឹកជំនន់បានបង្កផលប៉ះពាល់លិចស្រូវកើនដល់ប្រមាណ២៥,២២៣ហិកតា, ដំឡូងមី២២ហិកតា និងដំណាំរួមផ្សំប្រមាណ៧៩ហិកតាសត្វពាហនៈ១០៣ក្បាល។ ចំណែកហេដ្ឋារចនាសម្ព័ន្ធរងផលប៉ះពាល់ លិចសាលាចំនួន២៦កន្លែង, វត្តអារាមចំនួន៩, មណ្ឌលសុខភាពចំនួន២, ទឹកហូរកាត់ផ្លូវ៥៤១ខ្សែ ប្រវែង ២២៧,៣៣ ម៉ែត្រ។ ចំពោះប្រជាជនដែលកំពុងស្នាក់នៅទួលសុវត្ថិភាពបានទទួលស្បៀងសង្គ្រោះបន្ទាន់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គ្រប់ចំនួនហើយផងដែរ៕
