ខេត្តកែប ៖ ឯកឧត្តម សំ សារីន ប្រធានក្រុមប្រឹក្សាខេត្ត ឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប និងលោកជំទាវ ស ម៉ាលីដា នៅព្រឹកថ្ងៃសុក្រ ទី០៤ ខែតុលា ឆ្នាំ២០២១នេះ​ បានអញ្ជើញជួបសំណេះសំណាលជាមួយមន្ត្រីរាជការសាលាខេត្តកែប ក្នុងឱកាសពិធីបុណ្យកាន់បិណ្ឌ ភ្ជុំបិណ្ឌ​ ឆ្នាំ២០២១។

ថ្លែងក្នុងពិធីជួបសំណេះសំណាល​នាឱកាសនោះ ឯកឧត្តម​ អភិបាលខេត្ត មានប្រសាសន៍ថា រដ្ឋបាលខេត្ត តែងតែធ្វើការជួបជុំមន្ត្រីរាជការក្នុងឱកាសបុណ្យចូលឆ្នាំ និងភ្ជុំបិណ្ឌ និងឱកាសឆ្លងឆ្នាំសាកលជាដើម ដើម្បីជាការលើកទឹកចិត្ត ដល់កិច្ចខិតខំប្រឹងប្រែង អនុវត្តតួនាទីភារកិច្ច និងជាការរឹតចំណង កិច្ចសហការ សាមគ្គីគ្នាទៅវិញទៅមក រវាងថ្នាក់ដឹកនាំ ជាមួយមន្ត្រីរាជការគ្រប់លំដាប់ថ្នាក់ នៅក្នុងរចនាសម្ព័ន្ធសាលាខេត្ត។

ជាមួយគ្នានេះ ឯកឧត្តមអភិបាលខេត្ត ក៏បានថ្លែងអំណរគុណមន្ត្រីរាជការសាលាខេត្តទាំងអស់ ដែលខិតខំប្រឹងប្រែង អនុវត្តតួនាទី ភារកិច្ច ប្រកបដោយស្មារតីទទួលខុសត្រូវ ការសហការគ្នាល្អ ធ្វើអោយការងារទទួលបានលទ្ធផលល្អប្រសើរ ។ ទន្ទឹមនោះ ឯកឧត្តម​អភិបាលខេត្ត ស្នើដល់ថ្នាក់ដឹកនាំខេត្ត និងមន្ត្រីរាជការទាំងអស់​ បន្តនូវប្រពៃណីដ៏ល្អប្រពៃនេះតទៅ ដើម្បីសម្រេចឲ្យបាននូវផែនការយុទ្ធសាស្រ្ត របស់រារដ្ឋាភិបាលដែលបានដាក់ចេញ សំដៅបង្កើនជំនឿជឿជាក់លើការដឹកនាំ របស់រារដ្ឋាភិបាលមកលើប្រជាជន និងដើម្បីថែរក្សាសន្តិសុខ សណ្តាប់ធ្នាប់របៀបរៀបរយសាធារណៈ លើកកម្ពស់ជីវភាពរស់នៅរបស់ប្រជាពលរដ្ឋ និងរួមគ្នាអភិវឌ្ឍខេត្តកែប​ឲ្យមានភាពរីកចម្រើនតទៅទៀត។

ក្នុងឱកាសនោះដែរ ឯកឧត្តម​​ ប្រធាន​ក្រុម​ប្រឹក្សា​ខេត្ត​ និងឯកឧត្ដម​ អភិបាលខេត្ត ក៏បានឧបត្ថម្ភថវិកា​ និងសម្ភារជាអនុស្សាវរីយ៍មួយចំនួនជូន​ដល់​ឯកឧត្តម​ លោកជំទាវ​ លោក​ លោកស្រី​ ថ្នាក់ដឹកនាំខេត្ត មន្ត្រីរាជការ មន្ត្រីជាប់កិច្ចសន្យាសាលាខេត្ត ផងដែរ៕ (រដ្ឋបាលខេត្ត)