អាវុធហត្ថលើផ្ទៃប្រទេសចេញសេចក្តីប្រកាសព័ត៌មានពាក់ព័ន្ធការឃាត់ខ្លួនមេបញ្ជាការអាវុធហត្ថក្រុងក្រចេះករណីប្រើហិង្សាលើអ្នកបម្រើ
ខេត្តក្រចេះ ៖ អាវុធហត្ថលើផ្ទៃប្រទេសចេញសេចក្តីប្រកាសព័ត៌មានពាក់ព័ន្ធការឃាត់ខ្លួនមេបញ្ជាការអាវុធហត្ថក្រុងក្រចេះករណីប្រើហិង្សាលើក្មេងស្រី ដែលជាអនីតិជន២នាក់ ដែលជាកូនឈ្នួល នៅក្នុងភូមិគ្រឹះ ក្នុងភូមិរកាកណ្តាល១ សង្កាត់រការកណ្តាល ក្រុងក្រចេះ ខេត្តក្រចេះ កាលពីថ្ងៃទី២៧ ខែតុលា ឆ្នាំ២០២១។
លោក ទេព ហ៊ុយ អាយុ៤២ឆ្នាំ ជាមេបញ្ជាការអាវុធហត្ថក្រុងក្រចេះ ជាម្ចាស់ភូមិគ្រឹះ និងជាម្ចាស់ហាងលក់ទូរស័ព្ទដៃ បានធ្វើទារុណកម្មយ៉ាងធ្ងន់ធ្ងរទៅលើក្មេងស្រី មានអាយុ១២ ទាំង២នាក់ គឺវាយដំ ច្រំធាក់ នៅភូមិគ្រឹះរបស់ខ្លួនដែលមានទីតាំងខាងលើ កាលថ្ងៃទី២៧ ខែតុលា ឆ្នាំ២០២១។
យោងតាមប្រភពព័ត៌មានដែល ភ្នំពេញដេលី ទទួលបាន ក្មេងស្រី ដែលជាអនីតិជន២នាក់ ដែលជាកូនឈ្នួល បានរងនូវអំពើហិង្សាដ៏ធ្ងន់ធ្ងររហូតមានអាការៈចូលពេទ្យទំាង២នាក់ ហើយបច្ចុប្បន្ន ក្មេងស្រីទាំង២នាក់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តក្រចេះ។ ចំណែកជនបង្ក នៅថ្ងៃទី៣០ខែតុលា ឆ្នាំ២០២១ ត្រូវកម្លាំងកងរាជអាវុធហត្ថលើផ្ទៃប្រទេស សហការជាមួយកងរាជអាវុធហត្ថខេត្តក្រចេះធ្វើការឃាត់ ខ្លួនជាបណ្តោះអាសន្នដើម្បីសួរនាំ និងបន្តតាមនីតិវិធីច្បាប់៕
