ក្រសួងនឹងបំពាក់ឧបករណ៍ និងកម្មវិធីវាស់ស្ទង់គុណភាពសេវាទូរស័ព្ទ និងអ៊ីនធឺណិត នៅទូទាំងប្រទេស
ភ្នំពេញ ៖ ក្រសួងប្រៃសណីយ៍ និងទូរគមនាគមន៍ (ក.ប.ទ.) បានចេញសេចក្តីប្រកាសព័ត៌មាន ស្តីពីការគ្រោងនឹងបំពាក់ឧបករណ៍ និងកម្មវិធីវាស់ស្ទង់គុណភាពសេវាទូរស័ព្ទ និងអ៊ីនធឺណិត នៅទូទាំងប្រទេស។
បើតាមសេចក្តីប្រកាសព័ត៌មានទទួលបាននៅព្រឹកថ្ងៃទី១០ ខែធ្នូនេះ បានបញ្ជាក់ថា នាពេលខាងមុខនេះ ក្រសួងប្រៃសណីយ៍ និងទូរគមនាគមន៍ គ្រោងដំឡើងឧបករណ៍ និងដាក់ឱ្យប្រើប្រាស់កម្មវិធីវាស់ស្ទង់គុណភាពសេវាទូរគមនាគមន៍ ដើម្បីលើកកម្ពស់គុណភាពសេវាទូរសព្ទនិងអ៊ីនធឺណិត និងការពារផលប្រយោជន៍សាធារណៈ ក៏ដូចជាជំរុញការធ្វើអាជីវកម្មក្នុងវិស័យទូរគមនាគមន៍ ប្រកបដោយសុចរិតភាពនិងការទទួលខុសត្រូវខ្ពស់៕
