ខេត្តក្រចេះ ៖ នៅថ្ងៃពុធ ៣រោច ខែមិគសិរ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២២ ខែ ធ្នូ ឆ្នាំ២០២១ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ អញ្ជើញចូលរួមបើកអង្គប្រជុំជាមួយមជ្ឈមណ្ឌលបណ្តុះបណ្តាលវិជ្ជាជីវៈរួមនិងវិស័យឯកជន ជាមួយ និងពិព័រណ៍ការងារផលិតលរបស់ក្រុមហ៊ុន អ. អេ. អឹម ខេមបូឌា ដែលប្រព្រឹត្តទៅនៅសាលាមហោស្រពខេត្តក្រចេះ។

ពិធីនេះមានការចូលរួមពីសំណាក់ ឯកឧត្ត លោកជំទាវជាគណៈអភិបាលរងខេត្តក្រចេះ លោក លោកស្រី ជាអភិបាល អភិបាលរងក្រុង ស្រុកទាំង៦ក្នុងខេត្ត លោក លោកស្រី ជាប្រធានអនុប្រធានមន្ទីរ ចំណុះឲ្យសាលាខេត្ត លោក លោកស្រីតំណាងក្រុមហ៊ុន រួមនិងលោកគ្រូ អ្នកគ្រូ សិស្សានុសិស្សប្រមាណជាង២០០នាក់ផងដែរ។

ឯកឧត្តម វ៉ា ថន អភិបាលខេត្ត បានមានប្រសាសន៍ថា វិស័យការងារ និងបណ្តុះបណ្តាលវិជ្ជាជីវៈ គឺជាវិស័យមួយត្រូវបានយកចិត្តទុកដាក់ រាជរដ្ឋាភិបាលនៃ ព្រះរាជាណាចក្រកម្ពុជា ហើយវិស័យនេះបានជំរុញអោយមានការអភិវឌ្ឍន៍ ផ្នែកវិស័យឯកជន និងបានចូល រួមចំណែកធ្វើឲ្យមានការកើនឡើង នូវកំណើនសេដ្ឋកិច្ចជាតិតាមរយៈកម្លាំងពលកម្មដែលមានជំនាញ និងការរីកដុះដាលនៃរោងចក្រ សហគ្រាស សិប្បកម្ម ភោជនីយដ្ឋាន សណ្ឋាគារ និងក្រុមហ៊ុនឯកជនមួយចំនួនធំទៀតផងដែរ ហើយការរីកចំរើននៃវិស័យឯកជនទាំងនោះបាន វាអាស្រ័យដោយមាន កំលាំងពលកម្ម មានធនធានមនុស្សប្រកបដោយចំណេះដឹង និងជំនាញពិតប្រាកដមួយ ដើម្បីធានាបាននូវការផលិត និងកិច្ចដំណើរការរបស់រោងចក្រ សហគ្រាសឲ្យមានសកម្មភាពរស់រវើកជាប់ជានិរន្ត ប្រកបដោយចីរភាព និងកំណើន។

ឯកឧត្តមបន្តថា នៅពេលដែលកិច្ចសហការល្អរវាងវិស័យឯកជន និងវិស័យសាធារណៈធ្វើបានល្អ យើងនឹងទទួលបាននូវភាពឈ្នះចំនួន៤គឺ ទី១ មជ្ឈមណ្ឌលបណ្តុះបណ្តាលបច្ចេកទេសនិងវិជ្ជាជីវៈនឹងអនុវត្តកម្មវិធីសិក្សាមួយដែលឆ្លើយតបទៅនឹងតម្រូវការជាក់ស្តែងរបស់ទីផ្សាការងារទាំងក្នុងពេលបច្ចុប្បន្ន និងក្នុងពេលអនាគត ទី២ ក្រុមហ៊ុនឬសហគ្រាសអស់លោក លោកស្រីនឹងទទួលបាននូវកម្លាំងពលកម្មល្អ បង្កើនផលិតភាពការងារ និងប្រាក់ចំណេញខ្ពស់ នោះជាអ្វីដែលក្រុមហ៊ុនទាំងអស់ប្រាថ្នាចង់បាន ទី៣ ប្រជាពលរដ្ឋរបស់យើងលោកមានជំនាញវិជ្ជាជីវៈពិតប្រាកដ មានការងារ និងប្រាក់ចំណូលស្ថិតស្ថេរ កាត់បន្ថយបាននូវចំណាកស្រុកដោយប្រថុយប្រថាន កាត់បន្ថយនូវអំពើចោរកម្ម និងការប្រព្រឹត្តបទល្មើសផ្សេងៗ ចូលរួមក្នុងការអនុវត្តគោលនយោបាយភូមិឃុំមានសុវត្ថិភាពរបស់រាជរដ្ឋាភិបាល និងទី៤ ក្រុមហ៊ុនមានដំណើរការល្អ មានប្រាក់ចំណេញកើនឡើង ប្រជាពលរដ្ឋមានការងារ និងប្រាក់ចំណូលស្ថិតស្ថេរ លោក អ.អិម.អេ.ខេមបូឌា និងអង្គការ ស្វីសខន់ថាក់ ដែលមានកិច្ចសហការយ៉ាងល្អ ជាមួយមជ្ឈមណ្ឌលបណ្តុះបណ្តាលវិជ្ជាជីវៈខេត្តក្រចេះ និងបន្តពង្រីកកិច្ចសហការជាមួយគ្នា នូវការងារមួយចំនួនទៀតតាមដែលអាចធ្វើបាន ដូចជាការបណ្តុះបណ្តាលកម្លាំងពលកម្មជំនាញសម្រាប់ផ្គត់ផ្គង់តម្រូវការរបស់ក្រុមហ៊ុនលើវិស័យនិងការអភិវឌ្ឍន៍ធនធានមនុស្សប្រកបដោយគុណភាព និងប្រសិទ្ធភាពខ្ពស់៕