ខេត្តមណ្ឌលគិរី៖ នាព្រឹកថ្ងៃអង្គារ ៦កើត ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៥ ខែមិថុនា ឆ្នាំ២០២១ នៅសាលាស្រុកកោះញែក ខេត្តមណ្ឌលគិរី បានរៀបចំពិធីប្រកាសផ្ទេរភារកិច្ចតែងតាំងមុខតំណែងនិងតម្លើងឋានន្តរស័ក្តិជូនមន្រ្តីនគរបាលជាតិ នៃអធិការដ្ឋាននគរបាលស្រុកកោះញែកចំនួន ០៤រូប​ ពិធីនេះរៀបចំឡើងក្រោមអធិបតីភាព លោកឧត្តមសេនីយ៍ទោ​ ឡោ សុខា ស្នងការនគរបាលខេត្ត តំណាងដ៏ខ្ពង់ខ្ពស់ ឯកឧត្តម​ នាយឧត្តមសេនីយ៍​ សន្តិបណ្ឌិត នេត សាវឿន អគ្គស្នងការនគរបាលជាតិ​ ព្រមទាំងមានការអញ្ជើញចូលរួមពីលោកប្រធានក្រុមប្រឹក្សាស្រុក​ លោកអភិបាលរងស្រុក​ លោក លោកស្រី​ស្នងការរង​ លោកអធិការ​ អធិការរង​ នាយ.នាយរងផ្នែក​ នាយ.នាយរងប៉ុស្តិ៍នគរបាលរដ្ឋបាលទាំង៦​ និងមន្ត្រី នៃអធិការដ្ឋាននគរបាលស្រុកកោះញែក​ ដែលបានចូលរួមជាច្រើនរូបផងដែរ។

ជាកិច្ចចាប់ផ្តើមលោកវរសេនីយ៍ ឯក ខ្លូត សុឃា អធិការនៃអធិការ ដ្ឋាននគរបាលស្រុកកោះញែក បានឡើងអានរបាយការណ៍ស្វាគមន៍សង្ខេបជូនគណៈអធបតីជូនជ្រាប។
បន្ទាប់មកលោកវរសេនីយ៍ឯក​ ម៉ៅ រិទ្ធី នាយការិយាល័យបុគ្គលិក នៃស្នងការដ្ឋាននគរបាលខេត្ត បានឡើងអានប្រកាសផ្ទេរភារកិច្ចតែងតាំងមុខតំណែងរបស់ក្រសួងមហាផ្ទៃ​ និងសេចក្តីសម្រេចរបស់អគ្គស្នងការដ្ឋាននគរបាលជាតិ។ លោកវរសេនីយ៍ឯក យ៉ម ហ៊ុនអេង​ ដែលបានទទួលតំណែងថ្មី ជាអធិការ នៃអធិការដ្ឋាននគរបាលស្រុកកោះញែក​ បានឡើងប្តេជ្ញាចិត្តក្នុងនាមតំណាងមន្ត្រី ៤រូប​ ការពារនិងស្មោះត្រង់ជានិច្ចចំពោះជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់។

ប្រសាសន៍ផ្តាំផ្ញើរបស់លោកឧត្តមសេនីយ៍ទោ ឡោ សុខា ស្នងការនគរបាលខេត្ត​ ដល់មន្ត្រី នៃអធិការដ្ឋាននគរបាលស្រុកកោះញែក​ ដែលទើបទទួលបានប្រកាសផ្ទេរភារកិច្ច​ និងតំឡើងឋានន្តរស័ក្តិថ្មី​ ត្រូវខិតខំធ្វេីការងារឲ្យបានល្អប្រសើរបន្ថែមទៀត ត្រូវមានកិច្ចសហការគ្នាល្អ ត្រៀមលក្ខណៈរួចជាស្រេចក្នុងការបម្រើសេវាជូនប្រជាពលរដ្ឋ ថែរក្សាសុខសន្តិភាព សុវត្ថិភាព និងទប់ស្កាត់នូវរាល់បទល្មើសគ្រប់ប្រភេទនៅក្នុងមូលដ្ឋានរបស់ខ្លួនគ្រប់គ្រងឲ្យបានល្អប្រសើរ​ និងដាក់វេនប្រចាំការ ២៤ម៉ោងលើ២៤ម៉ោងជាពិសេសអនុវត្តតាមគោលនយោបាយភូមិ-ឃុំមានសុវត្ថិភាពទាំងប្រាំពីរចំណុចរបស់រាជរដ្ឋាភិបាល​ ដើម្បីឲ្យគោលនយោបាយនេះសម្រេចបានជោគជ័យ​ ៕