ខេត្តមណ្ឌលគិរី ៖ ដោយមានការចង្អុលបង្ហាញដ៏ខ្ពង់ខ្ពស់ពីឯកឧត្តម ស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរី លោក ណយ ច័ន្ទតារា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តមណ្ឌលគិរី និងជាប្រធានក្រុមការងារយុវជនគណបក្សប្រជាជនកម្ពុជាចុះជួយឃុំដាក់ដាំ ស្រុកអូររាំង បាននាំយកអំណោយសប្បុរសជននានាផ្តល់ជូនតាមរយៈអធិការដ្ឋាននគរបាល ក្រុងសែនមនោរម្យ ដើម្បីផ្គត់ផ្គង់ដល់កម្លាំង ក្នុងប្រតិបត្តិការប្រយុទ្ធប្រឆាំងនឹងជំងឺកូវីដ-១៩ ដែលកំពុងរីករាលដាល ក្នុងព្រឹត្តិការណ៍សហគមន៍ ២០ កុម្ភៈ ជាពិសេសនៅតំបន់បិទខ្ទប់ ក្នុងភូមិសាស្ត្រ ឃុំ ដាក់ដាំ ស្រុកអូររាំង និង ភូមិសាស្ត្រ ក្រុងសែនមនោរម្យ ខេត្តមណ្ឌលគិរី ដែលពិធីនេះបានប្រព្រឹត្តិទៅនៅអធិការដ្ឋាននគរបាលក្រុងសែនមនោរម្យ នាព្រឹកថ្ងៃទី១៨ ខែ មិថុនា ឆ្នាំ២០២១។

លោក ណយ ច័ន្ទតារា បានឲ្យដឹងថា ស្បៀង សម្ភារ និងថវិកា ដែលបានមកពីសប្បុរសជន រួមមាន ៖ រូបលោកផ្ទាល់បានចូលរួមថវិកាចំនួន៤០ម៉ឺនរៀល និងទឹកបរិសុទ្ធ២០កេស អ្នកស្រីស្រីអូន ដេប៉ូលក់ភេជ្ជៈនៅផ្សារសែនមនោរម្យ ថវិកាចំនួន៤០ម៉ឺនរៀល រួមនឹង មី៥០កេស ត្រីខ៥០០កំប៉ុង ទឹកសុទ្ធ១០កេស ម៉ាស់១កេសធំ កាហ្វេ៥០កញ្ចប់ធំ ទឹកស៊ីអ៊ីវ១២០ដប និងទឹកត្រីចំនួន១២០ដប, លោក ឃី ឆៃវ៉ាត ថវិកាចំនួន២០ម៉ឺនរៀល លោក សាញ់ លាង អនុប្រធានផ្សារសែនមនោរម្យថវិកាចំនួន១០ម៉ឺនរៀល។ ក្រៅពីនោះ ក៏មានសប្បុរសជនដទៃទៀតបានឧបត្ថម្ភជាស្បៀង សម្ភារៈ និងថវិកាចំនួនបន្ថែមទៀតផងដែរ។

នាឱកាសនោះដែរ លោកណយ ចន្ទ័តារា ក៏បានថ្លែងអំណរគុណដល់អាជីវករ និងបងប្អូនសប្បុរសជននានា ដែលបានឧបត្ថម្ភ ជាស្បៀង និង សម្ភារៈ ដើម្បីជួយផ្គត់ផ្គង់ដល់កងកម្លាំងដែលឈរជើងនៅណុចបិទខ្ទប់បណ្តោះអាសន្ន ដែលមានប្រជាពលរដ្ឋវិជ្ជមានកូវីដ-១៩ ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ។ ទន្ទឹមនោះ លោកក៏បានលើកទឹកចិត្តដល់កងកម្លាំង ដែលបំពេញបេសកម្មក្នុងការប្រយុទ្ធប្រឆាំងនឹងជំងឺកូវីដ-១៩ និង ប្រជាពលរដ្ឋទាំងអស់ ត្រូវចូលរួមអនុវត្តវិធានការ ៣ការពារ ៣កុំ និង ២ចូលរួម របស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ក្នុងការបង្ការទប់ស្កាត់ការរីករាលដាលនៃជំងឺកូវីដ-១៩៕