កម្លាំងចម្រុះចុះបង្ក្រាបសកម្មភាពកាប់បំផ្លាញឈើឆ្លងដែនចូលទឹកដីកម្ពុជានៅច្រកអូរហ៊ុច
ខេត្តមណ្ឌលគិរី ៖ យ៉ាងតិចមានឈើប្រមាណជាពីររយកំណាត់ ជាមួយនឹងត្រាក់ទ័រចំនួនពីរគ្រឿងរួមទាំងវត្ថុតាងមួយចំនួនទៀត ត្រូវបានសមត្ថកិច្ចចម្រុះចុះបង្ក្រាបក្នុងបទល្មើសជាក់ស្ដែង នូវសកម្មភាពមានទាំងជនជាតិវៀតណាម និងជនជាតិខ្មែរ បានឆ្លងដែនចូលទឹកដីកម្ពុជា កាប់បំផ្លាញឈើដឹកជញ្ជូនទៅប្រទេសវៀតណាម នៅក្នុងតំបន់អូរហ៊ុចនៃច្រកព្រំដែន (កម្ពុជា-វៀតណាម) ក្នុងនោះកាប់នៅក្នុងតំបន់នៃស្រុកអូររាំង និងស្រុកកែវសីមា ខេត្តមណ្ឌលគិរី។
ប្រតិបត្តិការទ្រង់ទ្រាយធំនេះ ដឹកនាំសម្របសម្រួលនីតិវិធីដោយតំណាងអយ្យការលោក អ៊ាង សុគន្ធ ព្រះរាជអាជ្ញារងខេត្តមណ្ឌលគិរី បានដឹកនាំកម្លាំងសមត្ថកិច្ចចម្រុះបានចុះបង្ក្រាបបទល្មើសព្រៃឈើតាមបន្ទាត់ព្រំដែន (អូរហ៊ុច) ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី នៅថ្ងៃទី២១ ខែមិថុនា ឆ្នាំ២០២១ បង្ក្រាបបានឈើចំនួន២០០រួមនិងគ្រឿងចក្រមួយចំនួនទៀត។
សមត្ថកិច្ចឱ្យដឹងថា កំណាត់ឈើចំនួន២០០ដុំ (ស្រឡៅ១៥០ដុំ , សុក្រម៥០ដុំ) ត្រាក់ទ័រ០២គ្រឿង ម៉ូតូកែច្នៃ០១គ្រឿងត្រូវបានកម្លាំងជំនាញ និងស្ថាប័នអយ្យការបង្ក្រាបបាន ហើយបច្ចុប្បន្នមន្ត្រីជំនាញកំពុងធ្វើការស្រាវជ្រាវរកជនល្មើស និងអ្នកនៅពីក្រោយ ដើម្បីយកមក ផ្តន្ទាទោសតាមផ្លូវច្បាប់ឲ្យបានម៉ឺងម៉ាត់ ចំណែកវត្ថុតាងរក្សាទុកនៅស្នាក់ការដែនជម្រកសត្វព្រៃ(៦៤)៕
