ខេត្តមណ្ឌលគីរី ៖ មន្ត្រីជំនាញបានចុះបង្ក្រាប និងរឹបអូសឈើជាច្រើនម៉ែត្រគូប ជាប្រភេទឈើអារនៅចំណុចភូមិចក់ចារ ឃុំស្រែឈូក ស្រុកកែវសីម៉ា ខេត្តមណ្ឌលគីរី ដែលប្រភពពីអ្នកស្រុកប្រាប់ថា ជាឈើរបស់ឈ្មួញឈ្មោះ ប្រុស។

ប្រតិបត្តិការចុះបង្ក្រាបនេះធ្វើឡើងកាលពីព្រឹកថ្ងៃទី២១ ខែកក្កដា ឆ្នាំ២០២១ បន្ទាប់ពីទទួលបានសេចក្តីរាយការណ៍ពីប្រជាពលរដ្ឋ ភ្លាមៗនោះលោក ហាន សុខជា ប្រធានដែនជម្រកសត្វព្រៃកែវសីម៉ា ក៏បានបញ្ជាទៅលោក ខាង សឿង និងលោក លី ដា ប្រធានស្នាក់ការស្រែឈូកឲ្យចុះប្រតិបត្តិការបង្ក្រាបភ្លាមៗតែម្តង។

បើតាមប្រភពពីអ្នកស្រុកបានឲ្យដឹងថា ឈ្មោះ ប្រុស នេះតែងតែគៀងគរប្រមូលទិញឈើពីប្រជាពលរដ្ឋតាមភូមិ ដែលបានចូលកាប់បំផ្លិចបំផ្លាញធនធានធម្មជាតិពីក្នុងព្រៃស្ថិតក្នុងដែនជម្រកសត្វព្រៃកែវសីម៉ា។

ចំពោះឈើដែលបង្ក្រាបបានមានចំនួន ៨៨ដើម ក្នុងនោះមុខកាត់ ៥គុណ១៥ម៉ែត្រគុណ១៦ម៉ែត្រ មានចំនួន៧ដើម, មុខកាត់ ៥គុណ ១៥ម៉ែត្រគុណ៧ម៉ែត្រ មានចំនួន៤៥ដើម និងមុខកាត់ ៥គុណ១៥ម៉ែត្រគុណ៨ម៉ែត្រ មានចំនួន៣៦ដើម។

ក្រោយធ្វើការវាស់វែងរួច ឈើទាំងនោះត្រូវបានជំនាញធ្វើការរឹបអូសយកទៅរក្សាទុកនៅឯស្នាក់ការបរិស្ថានស្រុកកែវសីម៉ា ដើម្បីទុកជាភស្តុតាង និងចាត់ការបន្តតាមនីតិវិធីផ្លូវច្បាប់៕