ទេសរដ្ឋមន្ត្រី លី ធុជ នាំអំណោយដ៏ថ្លៃថ្លារបស់សម្តេចតេជោឧបត្ថម្ភដល់បុគ្គលិកដោះមីនអង្គការ MAG ចំនួន១៨៤នាក់កំពុងធ្វើចត្តាឡីស័ក
ខេត្តបាត់ដំបង ៖ ព្រឹកថ្ងៃទី២២ ខែកក្កដា ឆ្នាំ២០២១ តាងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានអាជ្ញាធរមីន ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអញ្ជើញប្រគល់នូវគ្រឿងឧបភោគបរិភោគ និងថវិកាដែលជាអំណោយដ៏ថ្លៃថ្លារបស់សម្តេចតេជោនាយករដ្ឋមន្ត្រី ជូនដល់បុគ្គលិកដោះមីនបម្រើការងារនៅអង្គការ MAG ចំនួន ១៨៤នាក់ ដែលកំពុងជាប់ធ្វើចត្តាឡីស័កនៅស្រុកសំឡូត ខេត្តបាត់ដំបង ។
គ្រឿងឧបភោគបរិភោគទាំងនោះ មានការចូលរួមចំណែកឧបត្ថម្ភពីអាជ្ញាធរមីន សាខាកាកបាទក្រហមកម្ពុជា ខេត្តបាត់ដំបង និងមូលនិធិ Sir Bobby Charlton ប្រចាំកម្ពុជា រួមមាន ៖ អង្ករ, ទឹកបរិសុទ្ធ, ទឹកស៊ីអ៊ីវ, មី, ត្រីខកំប៉ុង, សាច់ក្រក, ត្រីងៀត, ម៉ាស់ និងអាកុល។ ក្រៅពីគ្រឿងឧបភោគបរិភោគ លោកទេសរដ្ឋមន្រ្តី បាននាំយកនូវថវិកាឧបត្ថម្ភដល់អ្នកវិជ្ជមានកូវីដជាបុគ្គលិកអង្គការ MAG ចំនួន ៣នាក់ ដោយក្នុងម្នាក់ ៥០ម៉ឺនរៀល និងថវិកា ៤ លានរៀល សម្រាប់ការងារធ្វើចត្តាឡីស័កនេះ ផងដែរ។
ពិធីនេះ ក៏មានការអញ្ជើញចូលរួមពី ឯកឧត្តម ព្រំ សុភមង្គល អគ្គលេខាធិការអាជ្ញាធរមីន ឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង លោក ប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង លោកស្រី ប៊ុត រតនា នាយិកាមូលនិធិ Sir Bobby Charlton ប្រចាំកម្ពុជា និងរដ្ឋបាលស្រុកសំឡូត។
ជួសមុខអោយបុគ្គលិកដោះមីនកម្ពុជាទាំងអស់ ឯកឧត្តមទេសរដ្ឋមន្ត្រី បានសម្ដែងនូវការដឹងគុណ និងកត្តញ្ញូតាធម៌ដ៏ខ្ពង់ខ្ពស់បំផុតជូនចំពោះសម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលសម្តេចទាំងទ្វេរតែងតែយកចិត្តទុកដាក់ អាណិតអាសូរ និងគិតគួរដល់សុខទុក្ខរបស់ប្រជាពលរដ្ឋកម្ពុជា ក៏ដូចជាការឧបត្ថម្ភគាំទ្រដល់បុគ្គលិកដោះមីនទាំងអស់រាល់ទុក្ខលំបាក និងគ្រប់ពេលវេលា។
ឯកឧត្តមទេសរដ្ឋមន្ត្រី បានមានប្រសាសន៍លើកឡើងថា «រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី បាននាំមកនូវសុខសន្តិភាព និងស្ថេរភាពនយោបាយពាសពេញផ្ទៃប្រទេសជូនជាតិមាតុភូមិ រួចហើយ អញ្ចឹងបងប្អូនអ្នកដោះមីនដែលជាក្មេងជំនាន់ក្រោយ ពិតជាមានភារកិច្ចយ៉ាងសំខាន់ ក្នុងការចូលរួមជាមួយសម្តេចតេជោ ដល់កិច្ចគាំពារសន្តិភាព និងការអភិវឌ្ឍ»។
ឯកឧត្តមទេសរដ្ឋមន្ត្រីបានបន្តទៀតថា ការងារបោសសម្អាតមីននៅកម្ពុជា នៅតែបន្តទៅមុខជានិច្ច ទោះបីមានការរីករាលជំងឺកូវីដក៏ដោយ ព្រមទាំងបានណែនាំឲ្យបុគ្គលិកអ្នកដោះមីនទាំងអស់ ត្រូវបន្តមានការប្រុងប្រយ័ត្នខ្ពស់ រក្សាអនាម័យ និងថែរក្សាសុខភាព ជាពិសេសត្រូវបន្តអនុវត្តន៍តាមវិធានការណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ៣ការពារ ៣កុំ អោយខ្ជាប់ខ្ជួន។
ឆ្លៀតក្នុងឱកាសនោះផងដែរ ឯកឧត្តម ទេសរដ្ឋមន្ត្រីក៏បានជួបសំណេះសំណាល សាកសួរសុខទុក្ខ និងនាំយកអំណោយចែកជូនមន្រ្តី/បុគ្គលិក នៅកងឯកភាពកម្ចាត់មីនទី២ របស់អង្គភាព CMAC ផងដែរ៕
