ខេត្តក្រចេះ ៖ ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ និងជាប្រធានគណៈបញ្ជាការឯកភាពខេត្ត នៅថ្ងៃចន្ទ១១រោច ខែបឋមាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៥ ខែកក្កដា ឆ្នាំ២០២១ បានអញ្ជើញចុះសួរសុខទុក្ខដល់កងនគរបាលវរៈការពារព្រុំដែនគោកលេខ៦១៩ និងកងវរៈការពារព្រំដែនលេខ៤ ដែលឈរជើងប្រចាំនៅក្នុងស្រុកស្នួល ខេត្តក្រចេះ។ អញ្ជើញអមដំណើរឯកឧត្តមអភិបាលខេត្តរួមមាន ៖ ឯកឧត្តម ទុយ ប៊ុនសេរីរត្ន័មុន្នី អភិបាលរងខេត្តក្រចេះរួមនិងអាជ្ញាធរដែនដីជាច្រើនរូបទៀត។

ក្នុងដំណើរអញ្ជើញចុះសួរសុខទុក្ខ នេះផងដែរ ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ និងជាប្រធានគណៈបញ្ជាការឯកភាពខេត្តត្រូវបានទទួលស្វាគមន៍យ៉ាងកក់ក្តៅបំផុតពីសំណាក់កងវរៈការពារព្រំដែនលេខ៦១៩ និងកងវរៈការពារព្រំដែនលេខ៤ គ្រប់ថានានុក្រមផងដែរ។

ជាមួយគ្នានេះ ឯកឧត្តម វ៉ា ថន គណៈអភិបាលខេត្ត និងជាប្រធានគណៈបញ្ជាការឯកភាពខេត្ត ក៏បានសាទរ យ៉ាងកក់ក្តៅបំផុតចំពោះវត្តមានកងកម្លាំងទាំងពីរក្រុមដែលខិតខំអនុវត្តភារកិច្ចតួនាទីបានល្អ និងគោរពវិន័យកងទ័ពបានខ្ជាប់ខ្ជួនតាមបទបញ្ជារផ្ទៃក្នុងរបស់អង្គភាព និងគោរពគោលការណ៍របស់ថ្នាក់ដឹកនាំគ្រប់ថានានុក្រម ពិសេសគោរពតាមគោលការណ៍របស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែនជានាយករដ្ឋមន្រ្តីនៃកម្ពុជា។

នាឱកាសនោះដែរ ឯកឧត្តម វ៉ា ថន ក៏បានក្រើនរំលឹកដល់កងកម្លាំងវរៈការពារព្រំដែនទាំងអស់ សូមរក្សានូវសាមគ្គីភាពផ្ទៃក្នុងអង្គភាពឲ្យបានល្អជានិច្ច ក្នុងការរក្សាការពារ បូរណភាពទឹកដី។ ជាថ្មីម្តងទៀត ឯកឧត្តមគណៈអភិបាលខេត្តបានមានប្រសាសន៍ផ្តាំផ្ញើដល់កងវរៈការពារព្រំដែនយើងទាំងអស់ សូមចូលរួមអនុវត្តន៍ឲ្យបានខ្ជាប់ខ្ជួន និងហ្មត់ចត់បំផុតនូវវិធានរបស់រាជរដ្ឋាភិបាល «៣ការពារ និង៣កុំ» និងវិធានផ្សេងៗទៀតរបស់ក្រសួងសុខាភិបាលដែលបានដាក់ចេញ។

ជាមួយគា្ននេះ ឯកឧត្តមក៏បានអញ្ជើញឧបត្ថម្ភគ្រឿងឧបភោគបរិភោគដល់កងកម្លាំងវរៈការពារព្រំដែន និងថវិកាមួយចំនួនទៀតផងដែរ៕