កំពង់ឆ្នាំង៖ សប្បុរសជនជិតឆ្ងាយ រួមមានសមាគមផ្សេងៗគ្នា បាននាំយកអំណោយផ្តល់ជូនដល់ រដ្ឋបាលខេត្តកំពង់ឆ្នាំង ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ធ្វើ ឡើងកាលពីព្រឹកថ្ងៃទី០៦ ខែកក្កដា ឆ្នាំ២០២១ នៅសាលាខេត្តកំពង់ឆ្នាំង ក្រោមអធិបតីភាព ឯកឧត្តម ស៊ុន សុវណារិទ្ធិ អភិបាលខេត្តកំពង់ឆ្នាំង និងឯកឧត្តម លោកជំទាវ ជាអភិបាលរងខេត្ត។

សប្បុរសជនដែលបានផ្តល់អំណោយដល់រដ្ឋបាលខេត្ត មានសមាគម ខ្មែរវៀតណាមនៅកម្ពុជា បានប្រគល់ជូនមានម៉ាស់ អាល់កុល និងជែល សមាគមវិនិយោគិនកម្ពុជា និងសមាគមយុវជនសេដ្ឋកិច្ចរាជធានីភ្នំពេញ បាននាំយកអំណោយមាន អាល់កុល ម៉ាស់ ជេល និងម៉ាស៊ីនវាស់កំដៅ។ ដែលអំណោយទាំងនេះ សម្រាប់រដ្ឋបាលខេត្តកំពង់ឆ្នាំង ចាត់ចែងក្នុងសកម្មភាពចូលរួមទប់ស្កាត់ការរីករាលដាលនៃជំងឺកូវីដ-១៩។

មានប្រសាសន៍នៅក្នុងឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានសំដែងនូវអគុណយ៉ាងជ្រាលជ្រៅចំពោះសមាគមទាំងអស់ ដែលបានបរិច្ចាកនូវធនធានដ៏មានតម្លៃនេះក្នុងការចូលរួមសកម្មភាពទប់ស្កាត់ការរីករាលដាលនៃជំងឺកូវីដ-១៩នៅខេត្តកំពង់ឆ្នាំង។ ដែលសកម្មភាពទាំងនេះបានបង្ហាញឱ្យឃើញពីការចូលរួមឥតងាករេ ក្នុងការប្រយុទ្ធប្រឆាំង និងជំងឺកូវីដ-១៩ ព្រោះថាបច្ចុប្បន្នជំងឺនេះបានបង្ករឱ្យមនុស្សឈឺ និងស្លាប់ជាបន្តបន្ទាប់ទូទាំងសាកលលោក។

ឯកឧត្ដម បានបន្តទៀតថា ការចូលរួមរបស់សប្បុរសជន គឺជាកិច្ចការមួយដែលមិនអាចខ្វះបាន ក្នុងការចូលរួមចែករំលែកគ្នាទៅវិញទៅមក ក្នុងកិច្ចការសង្គម ដើម្បីជួយគ្នាក្នុងគ្រាដ៏លំបាកនេះ។ ដូចនេះដើម្បីចូលរួមទប់ស្កាត់ ការឆ្លង ការរីករាលដាល ជំងឺកូវីដ-១៩នេះ យើងទាំងអស់គ្នា ត្រូវតែចូលរួមអនុវត្តឱ្យបានម៉ឺងម៉ាត់បំផុតអំពីវិធានការនានារបស់ក្រសួងសុខាភិបាល និងរាជរដ្ឋាភិបាល ដោយអនុវត្តឱ្យបានត្រឹមត្រូវ នូវ ៣ការពារ និង៣កុំ៕