នៅព្រឹក​ថ្ងៃទី៣១ ខែកក្កដា​ឆ្នាំ ២០២១​នេះឯកឧត្តម អ៊ុន ចាន់​ដា អភិបាលខេត្ត​កំពង់ចាម និង​ជា​ប្រធាន​គណៈកម្មការ​ខេត្ត​ប្រយុទ្ធប្រឆាំង​ជំងឺ​កូ​វីដ​១៩ បាន​ដឹកនាំ​ក្រុមការងារ​មន្ទីរ​ស្ថាប័ន​ពាក់ព័ន្ធ ចុះ​ពិនិត្យ​ឃ្លាំង​ចំនួន​៣ កន្លែង​ក្នុងស្រុក​-​ក្រុង​ចំនួន​៣ ដើម្បី​រៀបចំធ្វើ​មណ្ឌល​ច​ត្តា​ឡី​ស័ក និង​មន្ទីរពេទ្យ​ព្យាបាល​អ្នកជំងឺ​កូ​វីដ​-១៩កម្រិតស្រាល។

ឯកឧត្តម អ៊ុន ចាន់ដា អភិបាលខេត្ត បានមានប្រសាសន៍ថា បន្ទាប់ពីយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់កុមារ និងយុវវ័យមានអាយុចាប់ពី១២ឆ្នាំ ដល់ក្រោមអាយុ១៨ឆ្នាំរួចរាល់ជាស្ថាពរ រាជរដ្ឋាភិបាលកម្ពុជាក៏នឹងត្រូវត្រៀមការបើកសាលារៀនឡើងវិញចាប់ពីកម្រិតអនុវិទ្យាល័យឡើង។
ហើយទន្ទឹមនឹងនេះ រដ្ឋបាលខេត្ត បានត្រៀមប្រគល់អគារសិក្សាដែលបានយកមកធ្វើជាមណ្ឌលចត្តាឡីស័កនា និងមន្ទីរពេទ្យព្យាបាលកម្រិតស្រាល ពេលកន្លងមក ជូនក្រសួងអប់រំ យុវជន និងកីឡាវិញ។ បេតិនេះយើងត្រូវចាប់ផ្ដើម ជួយជួសជុលអាគារ ចំនួន០៣កន្លែង ក្នុងខេត្តកំពង់ចាម សម្រាប់ធ្វើជាមណ្ឌលចត្តាឡីស័ក និងធ្វើជាមន្ទីរពេទ្យព្យាបាលកម្រិតស្រាលរបស់រដ្ឋបាលខេត្ត ក្នុងនោះរួមមាន៖
១- ឃ្លាំងពាណិជ្ជកម្ម នៅបរិវេណមន្ទីរពាណិជ្ជកម្មខេត្តកំពង់ចាម ភូមិទី៤ សង្កាត់វាលវង់ ក្រុងកំពង់ចាម សម្រាប់ត្រៀមរៀបចំជាមណ្ឌលចត្តាឡីស័ករបស់រដ្ឋបាលខេត្ត។
២- ឃ្លាំងពាណិជ្ជកម្ម នៅភូមិត្រកួន ឃុំក្រឡា ស្រុកកំពង់សៀម សម្រាប់ត្រៀមរៀបចំធ្វើជាមន្ទីរពេទ្យព្យាបាលកម្រិតស្រាលរបស់រដ្ឋបាលខេត្ត។
៣- ឃ្លាំង នៅភូមិពាមជីកង ឃុំពាមជីកង ស្រុកកងមាស សម្រាប់ត្រៀមរៀបចំជាមណ្ឌលចត្តាឡីស័ករបស់រដ្ឋបាលខេត្ត។

ឯកឧត្តមអភិបាលខេត្ត បានគូសបញ្ជាក់ថាការជួសជុល និងរៀបចំទីតាំងទាំង០៣ កន្លែងនេះ ត្រូវរៀបចំឱ្យបានសមរម្យ ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចតេជោ ប្រមុខរាជរដ្ឋាភិបាលកម្ពុជា ជូនដល់បងប្អូនប្រជាពលរដ្ឋ និងពលករចំណូលស្រុក សម្រាកព្យាបាល និងធ្វើចត្តាឡីស័កឱ្យបានត្រឹមត្រូវតាមវិធានសុខាភិបាល។ ហើយការរៀបចំជួសជុលអគារទាំង០៣ទីតាំង ត្រូវរៀបចំសាងសង់បន្ទប់ទឹក (ប្រុស-ស្រី), ភ្ជាប់បណ្តាញទឹកស្អាត, បំពាក់បរិក្ខារអគ្គីសនី សម្ភារៈចំបាច់មួយចំនួនរួមមាន៖ គ្រែអ្នកជំងឺ(មុង ពូក ខ្នើយ ភួយ) រួមនឹងសម្ភារៈបរិក្ខាពេទ្យឱ្យស្របតាមលក្ខណៈបច្ចេកទេសរបស់ក្រសួងសុខាភិបាល។

​គូរបញ្ជាក់ថា៖ ចាប់តាំងពី​ការ​គម្រាមកំហែង ដោយ​ព្រឹត្តិការណ៍​សហគមន៍ ២០​កុម្ភៈ មកដល់​បច្ចុប្បន្ននេះ នៅក្នុង​ខេត្តកំពង់ចាម មាន​ករណី​ឆ្លង​សរុប ចំនួន ៣.៨៩០​ករណី ស្រី ២.៤៨៥​នាក់ ជាសះស្បើយ ២.៩៣៧​នាក់ ស្រី ១.៩៩៨​នាក់ និង​ករណី​ស្លាប់ ៨៩​នាក់ ស្រី ៦០​នាក់។ បច្ចុប្បន្ន អ្នក​ឆ្លង និង​កំពុង​សម្រាក​ព្យាបាល នៅ​មន្ទីរពេទ្យ​មេគង្គ​កំពង់ចាម មាន​ចំនួន ៨៦៤​នាក់៕​