រដ្ឋមន្រ្តីកសិកម្ម ៖ ការបង្កបង្កើនផលស្រូវរដូវវស្សាសម្រេចបានស្ទើរ១០០% គិតត្រឹមពាក់កណ្តាលខែសីហានេះ
ភ្នំពេញ ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងថា គិតត្រឹមពាក់កណ្តាលខែសីហាឆ្នាំ២០២១នេះ ការដាំដុះស្រូវវស្សាសម្រេចបាន ស្ទើរតែ១០០%ហើយ ខណដែលល្បឿនបង្កបង្កើនផលគឺលឿនជាងឆ្នាំ២០២០កន្លងទៅ ។
ឯកឧត្តមរដ្ឋមន្រ្តីបានថ្លែងប្រាប់អ្នកសារព័ត៌មានកាលពីពេលថ្មីៗនេះថា ការងារបង្កបង្កើនផលស្រូវរដូវវស្សា ដូចជា ភ្ជួររាស់ ដកស្ទូង មានល្បឿនលឿនជាងឆ្នាំ២០២០កន្លងទៅ ដោយសារកត្តាធម្មជាតិអំណោយផល មាន ភ្លៀងធ្លាក់ដើមរដូវវស្សា ដែលធ្វើឱ្យកសិករប្រញាប់ប្រញាល់ក្នុងបង្កបង្កើនផលស្រូវឱ្យបានទាន់ពេលវេលា ។
ឯកឧត្តមបញ្ជាក់ថា បច្ចុប្បន្ននេះការបង្កបង្កើនផលស្រូវ ប្រជាកសិករភាគច្រើន បានងាកទៅប្រើប្រាស់គ្រឿងយន្តកសិកម្ម ដោយបានកាត់បន្ថយការប្រើកម្លាំងមនុស្ស គោ ក្របី ស្ទើរតែ១០០ភាគរយទៅហើយ ដើម្បីធ្វើឱ្យការងារបង្កបង្កើនផលស្រូវមានសភាព លឿន ងាយស្រួល ត្រូវតាមស្តង់ដារ ជាពិសេសមានគុណភាពល្អ ។ ឯកឧត្តមរដ្ឋមន្ត្រីបញ្ជាក់បន្ថែមថា មកដល់ពេននេះយើងសម្រេចការភ្ជួររាស់បានប្រមាណជា១០០,០២ភាគរយលើផែនការហើយ ក្នុងនោះយើងបានធ្វើការភ្ជួររាស់ដោយគ្រឿងចក្របានប្រមាណជា៩៩,៤ភាគរយ ក្រៅពីនោះគឺការភ្ជួររាស់ដោយគោក្របី ។
ដោយឡែកបើយើងប្រៀបធៀបល្បឿននៃការភ្ជួររាស់ក្នុងឆ្នាំ២០២១នេះ គឺមានសភាពលឿនជាងឆ្នាំ២០២០កន្លងទៅ គឺប្រមាណជា៩៤,១៤៧ ហិកតា ។ ចំណែកការងារព្រួសនិងស្ទូងនៅក្នុងឆ្នាំ២០២១នេះ មកទល់នឹងអំឡុងខែ០៨នេះ យើងសម្រេចបាន ប្រមាណ ២,៥៩៧,២៩១ហិកតា គឺស្មើនឹង៩៩,៥៥ភាគរយ នៃផែនការសរុប២,៦០៩,០០០ហិកតា ដែលក្នុងនោះគឺស្រូវស្រាលមានប្រមាណ ៨៧៧,៧៨៩ ហិកតា ស្រូវកណ្ដាលប្រហែលជា ១២៥,៧៤១ហិកតា ស្រូវធ្ងន់ ៤២៦,៥០២ហិកតា ស្រែចម្ការសម្រេច ១៩,៦១២ ហិកតា និងស្រូវឡើងទឹកសម្រេចបាន២២,៦៤៦ ហិកតា ប្រសិនបើយើងប្រៀបធៀបល្បឿនការងារព្រួសនិងស្ទូង នាឆ្នាំ ២០២១នេះ គឺមានសភាពលឿនជាងឆ្នាំ២០២០ប្រមាណជា១៥៥,៦០០ ហិកតា។
ឯកឧត្តម វេង សាខុន ក៏បានឲ្យដឹងដែរថា នៅក្នុងឆ្នាំ២០២១នេះ ការនាំចេញស្រូវទៅកាន់ប្រទេសវៀតណាមគឺមានសន្ទុះកើនឡើងល្អប្រសើរ ស្របពេលជាមួយប្រជាកសិករប្រមូលផលស្រូវរដូវប្រាំងកាល ពីពេលកន្លងទៅបានល្អប្រសើរ គួបផ្សំជាមួយនឹងការប្រមូលផលស្រូវដើមរដូវវស្សានាពេលនេះ ដែលធ្វើឱ្យការនាំចេញសម្រេចបានប្រមាណជាង ២លានតោន មានការកើនឡើងជាងឆ្នាំ២០២០ ៕
![]()
![]()
![]()