ខេត្តកំពង់ធំ ៖ លោក ជឹម សៅ អាយុ៥៤ឆ្នាំ និងភរិយាឈ្មោះ វ៉ា ពន ជាប្រជាពលរដ្ឋរស់នៅភូមិពោធិពីរ ឃុំបារាយណ៍ ស្រុកបារាយណ៍ ខេត្តកំពង់ធំ បានសម្រេចចិត្តដាក់លិខិតគោរពជូនឯកឧត្ដម កើត រិទ្ធ រដ្ឋមន្ត្រីក្រសួងយុត្តិធម៌ ដើម្បីស្នើសុំជួយអន្តរាគមន៍ដោះស្រាយក្នុងរឿងវិវាទដីធ្លីជាមួយអាជ្ញាធរភូមិ-ឃុំ ដែលបានរារាំងពួកគាត់មិនឲ្យធ្វើការសាងសង់លំនៅឋានលើដីកម្មសិទ្ធិរបស់ខ្លួន។

តាមលិខិតមានចុះលេខ ៤២៨ ម៉ោង ១៤,០០ ដែលបានដាក់ចូល ក្រសួងយុត្តិធម៌ កាលពីថ្ងៃទី២៣ ខែសីហា ឆ្នាំ២០២១ របស់លោក ជឹម សៅ និងភរិយាឈ្មោះ វ៉ា ពន គឺមានកម្មវត្ថុស្នើសុំដល់ឯកឧត្តមរដ្ឋមន្ត្រីក្រសួងយុត្តិធម៌ជួយអន្តរាគមន៍ដោះស្រាយវិវាទដីធ្លី និងសុំដីការក្សាការពារ។

ខ្លឹមសារនៃលិខិតបញ្ជាក់ថា ពួកគាត់ត្រូវបានលោកមេភូមិពោធិពីរឈ្មោះ ទូច ប៊ុនលី និងលោកមេឃុំបារាយណ៍ឈ្មោះ ធូ សេង បានមករេរាំងមិនឲ្យធ្វើអ្វីៗទាំងអស់នៅលើដីបំរុងសាងសង់លំនៅឋាន ដោយសំអាងថា ជាដីចំណីអូរ និងដីទុកសាងសង់សាលាឆទាន។

ខ្លឹមសារនៃលិខិតបន្តថា មុនមន្ត្រីសុរិយោដីចុះវាស់វែង និងចេញប័ណ្ណកម្មសិទ្ធិ អាជ្ញាធរភូមិ-ឃុំ និងភូមិបាលបានឯកភាពគ្នា និងមានការបិទប្រកាសជូនដំណឹងជាសាធារណៈជាងមួយខែ តែពុំឃើញភាគីណាមួយចេញមកជំទាស់ឡើយ ទើបលោកប្រធានមន្ទីរចេញប័ណ្ណកម្មសិទ្ធិជូន ដែលដីនេះពួកគាត់បានកាន់កាប់តាំងពីឆ្នាំ១៩៧៩មកម្ល៉េះ រហូតទល់សព្វថ្ងៃនេះ។

បើយោងតាមវិញ្ញាបនបត្រសំគាល់ម្ចាស់អចលនវត្ថុលេខ 06010311-0299 ដែលចេញដោយ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ធំ ចុះថ្ងៃទី០២ ខែវិច្ឆិកា ឆ្នាំ២០២០ គឺលោក ជឹម សៅ និងភរិយាឈ្មោះ វ៉ា ពន មានសិទ្ធិធ្វើការកាន់កាប់ និងអាស្រ័យផល ឬសាងសង់អ្វីៗបានគ្រប់យ៉ាង។ ហើយបើពិនិត្យលើនីតិវិធីផ្លូវច្បាប់វិញ ពុំមានបុគ្គលណាម្នាក់មានសិទ្ធិមកប្តឹងទាមទារអ្វីទាំងអស់ ពីព្រោះថា វាបានផុតអាជ្ញានុកាល (សិទ្ធិ) នៃការប្តឹងតវាបាត់រួចទៅហើយ ដែលជាគោលការណ៍មុននឹងមន្ទីរជំនាញចេញប័ណ្ណកម្មសិទ្ធិជូនភាគីណាម្នាក់ គឺបានបិទប្រកាសផ្សព្វផ្សាយរយៈពេលយ៉ាងតិច១៥ថ្ងៃ ដើម្បីបើកផ្លូវឲ្យមានការតវ៉ា៕