ខេត្តមណ្ឌលគិរី ៖ រដ្ឋបាលខេត្តមណ្ឌលគិរី សហការជាមួយលេខាធិការដ្ឋាននៃក្រុមការងារបច្ចេកទេសលើកកម្ពស់TVET ខេត្តរតនគិរី នាព្រឹកថ្ងៃទី២៥ ខែសីហា ឆ្នាំ២០២១នេះ បានរៀបចំកិច្ចប្រជុំពិគ្រោះយោបល់ស្តីពីព័ត៌មាន និងគន្លឹះសំខាន់ៗក្នុងការដាក់សំណើសុំថវិកាសម្រាប់កម្មវិធីអភិវឌ្ឍន៍សហគ្រាសក្នុងខេត្តមណ្ឌលគិរីនិងរតនគិរី។

កិច្ចប្រជុំនេះ ប្រព្រឹត្តទៅតាមរយៈប្រពន្ធវីដេអូ (Zoom Meeting ) ក្រោមវត្តមាន លោក សាយ ម៉េងគីម អភិបាលរងខេត្ត និងជាប្រធានគណៈកម្មាធិការបណ្ដុះបណ្ដាលខេត្តមណ្ឌលគិរី និងលោក ឈុំ ខឿនអនុប្រធាននាយកដ្ឋានស្តង់ដារ និងកម្មវិធីសិក្សានៃក្រសួងការងារ និងបណ្ដុះបណ្ដាលវិជ្ជាជីវៈ លោក ចាបហូ សម្រងចិត្រា តំណាងមូលនិធិអភិវឌ្ឍន៍ជំនាញ លោក អឿ សំអាត តំណាងកម្មវិធីអភិវឌ្ឍន៍ជំនាញ (SDP) នៃស្វីសខន់ថាក់ ដៃគូអភិវឌ្ឍន៍ខេត្ត និងលោក លោកស្រី ប្រធានមន្ទីរជំនាញពាក់ព័ន្ធក្នុងខេត្តមណ្ឌលគិរី និងខេត្តរតនគិរី តំណាងសមាគមសហគ្រាស តំណាងអង្គការសមាគម អ្នកពាក់ព័ន្ធផ្សេងទៀត។

លោក សាយ ម៉េងគីម អភិបាលរងខេត្ត និងជាប្រធានគណៈកម្មាធិការបណ្ដុះបណ្ដាលខេត្តមណ្ឌលគិរី បានឲ្យដឹងថា ការរៀបចំកិច្ចប្រជុំពិគ្រោះយោបល់ស្តីពី ព័ត៌មាននិងគន្លឹះសំខាន់ៗក្នុងការដាក់សំណើសុំថវិកាសម្រាប់កម្មវិធីអភិវឌ្ឍន៍សហគ្រាសក្នុងខេត្តមណ្ឌលគិរីនិង រតនគិរី នេះឡើង ក្នុងគោលបំណងដើម្បីផ្ដល់ព័ត៌មាន និង គន្លឹះសំខាន់ៗការរៀបចំសំណើគម្រោងទៅមូលនិធិអភិវឌ្ឍន៍ជំនាញ សម្រាប់ការអភិវឌ្ឍន៍សហគ្រាស ក្នុងខេត្តមណ្ឌលគិរី និង ខេត្តរតនគិរី តាមរយៈលេខាធិការដ្ឋាននៃគណៈកម្មាធិការបណ្ដុះបណ្ដាលខេត្តមណ្ឌលគិរី និង តាមរយៈលេខាធិការដ្ឋាននៃក្រុមការងារបច្ចេកទេសលើកកម្ពស់ TVET ខេត្តមណ្ឌលគិរីនិងរតនគិរីដែលមានទិសដៅពង្រឹង និង ពង្រីកសក្តានុពលរបស់សហគ្រាសធុនតូច និង មធ្យមក្នុងវិស័យ TVET សម្រាប់ការងារយុវជន ។

លោកអភិបាលរងខេត្តមណ្ឌលគិរី ក៏បានជម្រុញដល់ មន្ទីរជំនាញ ស្ថាប័នពាក់ព័ន្ធ ទាំងអស់ត្រូវយកចិត្តដាក់ខ្ពស់ ប្រកបដោយស្មារតីស្វាហាប់ ទឹកចិត្តមុះមុត និងមានចក្ខុវិស័យច្បាស់លាស់ក្នុងដឹកនាំ ការគ្រប់គ្រងបន្ថែមទៀត ព្រមទាំងសម្លឹងឱ្យឆ្ងាយដែលអាចធ្វើទៅបានចំពោះផែនការអភិវឌ្ឍសហគ្រាសធុនតូច និង មធ្យមក្នុងខេត្ត ជាពិសេសសិក្សាអំពីលក្ខខ័ណ្ឌ និង ឯកសារតម្រូវនិងពិនិត្យពីលទ្ធភាពដាក់សំណើថវិកានេះ ៕