KNP

ថ្ងៃព្រហស្បតិ៍ ទី១៦ ខែឧសភា ឆ្នាំ២០៥០

ផ្សព្វផ្សាយព័ត៌មានពិត គ្រប់ទីកន្លែងជាមួយ គេហទំព័រ កោះញែកប៉ុស្តិ៍!

ទំព័រដើម ព័ត៌មានជាតិ ព័ត៌មានអន្តរជាតិ ព័ត៌មានអន្តរជាតិ ព័ត៌មានសន្តិសុខសង្គម

ព័ត៌មានថ្មីបំផុត

កសិករដាំពោតនៅភូមិខេត្អូញត្អែរពីធ្លាក់ចុះទិន្នផល ដោយសារភ្លៀងធ្លាក់ច្រើន **|**

កសិករដាំពោតនៅភូមិខេត្អូញត្អែរពីធ្លាក់ចុះទិន្នផល ដោយសារភ្លៀងធ្លាក់ច្រើន

ខេត្តស្ទឹងត្រែង ៖ ដំណាំពោតនារដូវនេះ ត្រូវបានសង្កេតឃើញថា ហាក់មិនទទួលទិន្នផលខ្ពស់ដូចឆ្នាំមុនៗនោះឡើយក្រោយពេលមានភ្លៀងធ្លាក់ច្រើន បែរជាបង្កឲ្យដំណាំរងការខូចខាត។

ជាក់ស្តែងកសិករនៅភូមិខេ សង្កាត់សាមគ្គី ក្រុងស្ទឹងត្រែងបានរៀបរាប់ថា ដំណាំពោតរបស់គាត់ឆ្នាំនេះ ហាក់មិនសូវបានផលល្អដូចឆ្នាំមុនសោះ ដោយសារមានទឹកភ្លៀងធ្លាក់ច្រើនពេក។

ពោលរៀបរាប់បណ្តើរ បំពេញកិច្ចការបណ្តើរក្នុងចម្ការពោតប្រហែល១ហិកតា បងស្រី ហ៊ឹម ស្រីទូច កសិករដាំពោតនៅភូមិខេបានឲ្យដឹងថា ពោតឆ្នាំនេះមិនសូវឲ្យផលទេ ដោយសារមានភ្លៀងធ្លាក់ចុងខែច្រើនពេកបណ្តាលឲ្យពោតកើតនូវជំងឺច្រើនប្រភេទ ពោតខ្លះក្រិន ផ្លែពោតខ្លះតូចៗ ហើយផ្លែខ្លះអត់មានគ្រាប់ទៀតផង ។

បងស្រីបន្តថា ឆ្នាំកន្លងៗទៅក្នុងខែនេះ ទឹកភ្លៀងអំណោយផលល្អ ដំណាំពោតក៏លូតលាស់បានល្អ និងមិនមានជំងឺ រីឯផ្លែក៏ធំៗ ល្អមានគ្រាប់ច្រើន ហើយលក់បានក្នុងតម្លៃខ្ពស់ជាងឆ្នាំនេះ ដោយគាត់លក់បានក្នុង១ផ្លែតម្លៃ៦០០រៀល បើប្រៀបធៀបនឹងឆ្នាំនេះ គាត់លក់បានតែ១ផ្លែ៣០០រៀល ទៅ៤០០រៀលប៉ុណ្ណោះ ។

បងស្រីទូចក៏បានបន្តថា បើទោះបីឆ្នាំនេះ ដំណាំពោតរបស់គាត់មិនអំណោយផលដូចឆ្នាំមុនៗក៏ដោយ ក៏គាត់នៅតែអាចកាច់លក់បានរាល់ថ្ងៃ ដោយទទួលបានកម្រៃពី១៥ម៉ឺន ទៅ២០ម៉ឺនរៀលក្នុង១ថ្ងៃ ហើយគាត់នៅតែអាចទប់ទល់ និងដោះស្រាយជីវភាពប្រចាំថ្ងៃរបស់គាត់បាន ។

សូមជម្រាបថា ប្រភេទដីនៅភូមិខេ ក្នុងសង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង គឺមានអំណោយផលល្អសម្រាប់វិស័យកសិកម្ម ហើយកសិករនៅតំបន់នោះភាគច្រើនគឺពឹងផ្អែកលើរបរកសិកម្មដើម្បីចិញ្ចឹមជីវភាពប្រចាំថ្ងៃ ដោយសារសណ្ឋានដីទាំងនេះ ស្ថិតនៅតាមដងទន្លេមេគង្គជាដីសម្បូរទៅដោយជីវជាតិ ៕