ស៊ីដនី​ ៖ ប្រធានាធិបតីអាមេរិក លោក ចូ បៃដិន នៅថ្ងៃពុធសប្ដាហ៍នេះបានប្រកាសពីសម្ព័ន្ធភាពត្រីភាគីថ្មីមួយជាមួយអូស្ត្រាលី និងចក្រភពអង់គ្លេសដើម្បីជួយពង្រឹងសមត្ថភាពកងទ័ពជើងទឹករបស់សម្ព័ន្ធមិត្តនៅក្នុងតំបន់ឥណ្ឌូ-ប៉ាស៊ីហ្វិក ជាមួយការសន្យាថានឹងផ្ដល់ឱ្យអូស្ត្រាលីនូវកងកម្លាំងនាវាមុជទឹកដើរដោយថាមពលថ្មីមួយ។ នេះបើតាមការចេញផ្សាយដោយទីភ្នាក់ងារព័ត៌មាន AFP។

មេដឹកនាំ​នៃ​ប្រទេស​ទាំង ៣ បានបង្ហាញ​ពី​សម្ព័ន្ធ​ភាពជា​មិត្ត​ដែលមាន​ឈ្មោះថា AUKUS កាលពី​ថ្ងៃ​ពុធ​ម្សិលមិញ​នេះ ដោយបាន​សង្កត់ធ្ងន់ថា នាវាមុជទឹក​ទាំងនោះ​នឹង​បំពាក់​ដោយ​ថាមពលនុយក្លេអ៊ែរ​មិនមែន​ផ្ទុក​អាវុធ​នុយក្លេអ៊ែរ​នោះទេ​។ ​អូស្ត្រាលី​គឺជា​ប្រទេស​ហត្ថលេខី​នៃ​សន្ធិសញ្ញា​ស្តីពី​ការមិន​រីកសាយ​ភាយ​អាវុធ​នុយក្លេអ៊ែរ (NPT)។​

កិច្ចសហប្រតិបត្តិការ​នេះ​មានការ​ចូលរួម​ពី នាយករដ្ឋមន្ត្រី​អូស្ត្រាលី​លោក​ស្ក​ត​ម៉ូ​រី​សុន (Scott Morrison) និង​សម​ភាគី​អង់គ្លេស​លោក​បូរី​សចន​សុន (Boris Johnson) រួម​ជាមួយនឹង​ប្រធានាធិបតី​អាមេរិក​លោក​ចូ​បៃ​ដិ​ន (Joe Biden) ហើយ​ប្រធានាធិបតី​ទាំង៣ ក៏បាន​និយាយថា ប្រទេស​ទាំង ៣ កំពុង​បោះជំហាន​ជា​ប្រវត្តិសាស្ត្រ​មួយ ដើម្បី​ធ្វើឱ្យ​កិច្ចសហប្រតិបត្តិការ​រ​បស់​យើង​កាន់តែ​មាន​ភាព​ស៊ីជម្រៅ​​។

គួរបញ្ជាក់ថា នៅក្នុងកិច្ចប្រជុំរបស់ខ្លួន មេដឹកនាំប្រទេសទាំង៣ខាងលើ មិនបានលើកឡើងពីឈ្មោះចិនឡើយ តែការប្រកាសពីសម្ព័ន្ធភាពត្រីបានបង្ហាញយ៉ាងច្បាស់ពីចេតនារបស់ពួកគេ នោះគឺគ្មានអ្វីក្រៅពីទប់ស្កាត់ការកើនឡើងឥទ្ធិពលចិននៅក្នុងតំបន់នោះទេ។ ម្យ៉ាងវិញទៀត ការសន្យាជួយ អូស្ត្រាលីផលិតនាវាមុជទឹក ក៏បានធ្វើឱ្យបារាំងអន់ចិត្ត និងខឹងសម្បារផងដែរ ខណៈទីក្រុងប៉ារីសកំពុងចរចាលក់នាវាមុជទឹកធម្មតាមានតម្លៃរាប់ពាន់លានដុល្លារឱ្យអូស្តា្រលី៕