អាជ្ញាធរខេត្តព្រះវិហារអំពាវនាវដល់ប្រជាពលរដ្ឋរស់នៅតាមដងស្ទឹងសែនបង្កើនការប្រុងប្រយ័ត្ន ខណៈជំនន់ទឹកភ្លៀងបន្ដហក់ឡើងខ្លាំង
ខេត្តព្រះវិហារ ៖ រដ្ឋបាលខេត្តព្រះវិហារ ចេញសេចក្ដីអំពាវនាវដល់ប្រជាពលរដ្ឋទាំងអស់ ជាពិសេស ប្រជាពលរដ្ឋដែលកំពុងរស់នៅតាមដងស្ទឹងសែន មាត់ទន្លេមេគង្គ និងតំបន់ងាយរងគ្រោះដោយសារទឹកជំនន់មួយចំនួនទៀត ត្រូវបង្កើនការប្រុងប្រយ័ត្នខ្ពស់ និងត្រូវស្វែងរកទីទួលមានសុវត្ថិភាពដែលនៅជិត ចៀសវាងកើតមានឡើងនូវគ្រោះថ្នាក់ផ្សេងៗ ខណៈជំនន់ទឹកភ្លៀងនៃទឹកស្ទឹងសែនបន្ដហក់ឡើងខ្លាំងឡើងៗ ដែលអាចឈានទៅដល់កម្រិតមួយបង្ករអោយមានការលិចលង់ និងត្រៀមបង្ការសង្គ្រោះ។
ក្នុងករណីប្រជាពលរដ្ឋជួបបញ្ហាដោយគ្រោះទឹកជំនន់ ត្រូវរាយការណ៍ និងផ្តល់ព័ត៌មានឲ្យបានឆាប់បំផុត ដល់អាជ្ញាធរភូមិ ឃុំ-សង្កាត់ ក្រុង ស្រុក ខេត្តជាបន្ទាន់ ដើម្បីអាជ្ញាធរមានលទ្ធភាព ចាត់វិធានការដោះស្រាយ ការពារ និងសង្គ្រោះឲ្យបានទាន់ពេលវេលា។
យោងតាមរបាយការណ៍របស់មន្ទីរធនធានទឹក និងឧតុនិយមខេត្តព្រះវិហារ នៅនៅវេលាម៉ោង ៧:០០នាទី ព្រឹកថ្ងៃទី២៦ ខែកញ្ញា ឆ្នាំ២០២១នេះ កម្រិតកម្ពស់ទឹកស្ទឹងសែនបន្ដហក់ឡើងកម្ពស់ ១១.៨០ម៉ លើសកម្រិតដែលត្រូវប្រកាសអាសន្នកម្ពស់ ១១.៥០ម៉ែត្រ៕
