ខេត្តស្វាយរៀង ៖ លោក ថន ថាវុទ្ធា អភិបាល នៃគណៈអភិបាលស្រុកចន្ទ្រា នៅព្រឹកថ្ងៃចន្ទ ៦រោច ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៧ ខែកញ្ញា ឆ្នាំ២០២១នេះ បានអញ្ជើញដឹកនាំក្រុមការងារស្រុកចុះ ពិនិត្យការបើកដំណើរការរៀន និងបង្រៀនឡើងវិញសម្រាប់សិស្សថ្នាក់ទី៩ និងទី១២ (ថ្នាក់ត្រៀមប្រឡង) នៅវិទ្យាល័យ ប៊ុន រ៉ានី ហ៊ុន សែន ចន្ទ្រា អនុវិទ្យាល័យផនសែនទេពធីតាសំរោង ទួលស្ដី ចន្ទ្រា ច្រេស និងអនុវិទ្យាល័យព្រៃគគីរ ក្នុងស្រុកចន្ទ្រា ។

ថ្លែងក្នុងឱកាសនេះដែរ លោក ថន ថាវុទ្ធា អភិបាលនៃគណៈអភិបាលស្រុកចន្ទ្រា បានប្រសាសន៍សាកសួរសុខទុក្ខលោកនាយកនាយករង លោកគ្រូ អ្នកគ្រូ និងសិស្សានុសិស្ស ពីស្ថានភាពរស់នៅ និងការសិក្សា តាមបែបបទថ្មីក្នុងអំឡុងពេល នៃការរាតត្បាតជំងឺកូវីដ-១៩ជាសកល ដែលនាំឱ្យសាលារៀនត្រូវបិទទ្វារ បង្កហានិភ័យបន្ទុចបង្អាក់ដល់ឱកាសទទួលបានការអភិវឌ្ឍរបស់កូនក្មួយសិស្សានុសិស្សទូទាំងប្រទេស។

លោកអភិបាលស្រុកបានបន្ថែមទៀតថា ដោយមើលឃើញពីការធ្លាក់ចុះ និងអាចគ្រប់គ្រងការឆ្លងរាលដាលជំងឺកូវីដ-១៩បាន រដ្ឋបាលស្រុកចន្ទ្រា អនុវត្តតាមការណែនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក៏ដូចជាក្រសួងអប់រំ យុវជន និងកីឡា បានពិនិត្យលទ្ធភាពបើកដំណើរការសាលាដែលស្ថិតក្នុងកម្រិតហានិភ័យទាបឡើងវិញ។ តែក៏សូមការចូលរួមពីមាតាបិតា អាណាព្យាបាល លោកគ្រូ អ្នកគ្រូ សូមណែនាំបន្ថែម ពីវិធានការការពារតាមការណែនាំរបស់រាជរដ្ឋាភិបាល និងក្រសួងសុខាភិបាល ដល់កូនក្មួយសិស្សានុសិស្សត្រូវអនុវត្តឱ្យបានម៉ឺងម៉ាត់ ជាពិសេសក្មួយៗត្រូវរក្សាគម្លា តសុវត្ថិភាព ពាក់ម៉ាស ឧស្សាហ៍លាងដៃជាមួយអាល់កុល ឬសាប៊ូឱ្យបានញឹកញាប់ បើមានបញ្ហាសុខភាពត្រូវជម្រាបដល់លោកគ្រូ អ្នកគ្រូជាបន្ទាន់។

ក្នុងឱកាសនោះដែរ លោក ថន ថាវុទ្ធា អភិបាល នៃគណៈអភិបាលស្រុកចន្ទ្រា បានឧបត្ថម្ភម៉ាសក្នុង១សាលា១០ប្រអប និងផ្ទាំងរូបភាព៕