ខេត្តរតនគិរី ៖ គណៈកម្មការរុករកគាស់លើកអដ្ឋិធាតុខេត្តរតនគិរី និងគណៈកម្មការរុករកគាស់លើកអដ្ឋិធាតុខេត្តកន្ទូម ឯកភាពគ្នា ៣ ចំណុចលើការងាររុករកគាស់លើកអដ្ឋិធាតុកងទ័ពស្ម័គ្រចិត្ត និងជំនាញការ វៀតណាម សម្រាប់រដូវប្រាំងឆ្នាំ២០២២-២០២៣ ខណៈដែលការឯកភាពនេះធ្វើឡើងនៅក្នុងកិច្ចប្រជុំគណៈកម្មការជំនាញរុករកគាស់លើកអដ្ឋិធាតុខេត្តទាំង២នៅរសៀលថ្ងៃទី ១៨ ខែ តុលា ឆ្នាំ២០២២ នាសាលប្រជុំសាលាខេត្តរតនគិរី ក្រោមអធិបតីភាព ឯកឧត្តម ស៊ូ សិរីអភិបាលរងខេត្តរតនគិរី និងជាប្រធានគណៈកម្មការ និងលោក ជំទាវ អុី ង៉ុកអភិបាលរងខេត្តកន្ទូម និងជាប្រធានគណៈកម្មការ។

ខ្លឹមសារនៃកិច្ចព្រមព្រៀងទាំង ៣ ចំណុចរួមមាន៖១.គណៈកម្មការជំនាញរុករកគាស់លើកអដ្ឋិធាតុខេត្តទាំងពីរ បន្តជំរុញដល់អាជ្ញាធរមូលដ្ឋានគ្រប់ លំដាប់ថ្នាក់ និងប្រជាពលរដ្ឋ ឲ្យបង្កើនការសហការ និងជួយបង្កលក្ខណៈងាយស្រួលដល់ក្រុម KS3 អនុវត្តការងាររុករកគាស់លើកអដ្ឋិធាតុក្នុងរយៈពេលអនុវត្តផែនការរបស់ភាគីទាំងពីរ និងធ្វើការផ្លាស់ប្តូរព័ត៌មានឲ្យគ្នាទៅវិញទៅមក ប្រសិនបើជួបការលំបាក គឺត្រូវពិភាក្សាគ្នា ដើម្បីដោះស្រាយ ឲ្យបានទាន់ពេលវេលា និងមានប្រសិទ្ធភាព ។

២.គណៈកម្មការជំនាញទាំងពីរបានឯកភាពគ្នានឹងជូនដំណឹង ស្តីពីស្ថានភាព វឌ្ឍនភាពការងារ ស្វែងរកជីកគាស់អដ្ឋិធាតុរបស់ក្រុមK53 វៀតណាមនិងបណ្តាប្រភពព័ត៌មានបញ្ចុះអដ្ឋិធាតុ ដែលផ្តល់ដោយប្រជាជនឲ្យគ្នាទៅវិញទៅមក។ ករណីរកឃើញអដ្ឋិធាតុមានសញ្ញាប្រទេសទី៣ ត្រូវជូនដំណឹងឲ្យគណៈកម្មាការជំនាញខេត្តទាំងពីរ ដើម្បីទទួលជ្រាប និងរាយការណ៍ជូនបណ្តាប ជំនាញពាក់ព័ន្ធ ដើម្បីដោះស្រាយ។

៣.ក្នុងរយៈពេលអនុវត្តភារកិច្ចការងារនៅកម្ពុជា កម្មាភិបាល បុគ្គលិក ក្រុមការងារKI3 (ខេត្ត កន្ទូម)និងក្រុមការពារអដ្ឋិធាតុខេត្តរតនគិរី ត្រូវគោរពច្បាប់ អនុវត្តទៅតាមទំនៀមទំលាប់ប្រពៃណី របស់កម្ពុជា និងត្រូវចូលរួមអនុវត្តន៍តាមវិធានការសុខាភិបាល និងវិធានការរដ្ឋបាលដើម្បីប្រយុទ្ធ ប្រឆាំងជំងឺកូវីដ-១៩ របស់កម្ពុជា ។

សូមបញ្ជាក់ថា ចាប់ពីថ្ងៃ០១ ខែវិច្ឆិកា ២០២២ គណៈកម្មការជំនាញខេត្តកន្ទូម នឹងបញ្ជូនក្រុមការងារ មធ្យោបាយ និងសម្ភារៈមកកាន់ភូមិសាស្ត្រខេត្តរតនគិរី ដើម្បីអនុវត្តភារកិច្ចរុករកគាស់លើកអដ្ឋិធាតុកងទ័ព ស្ម័គ្រចិត្ត និងជំនាញការវៀតណាម សម្រាប់រដូវប្រាំងឆ្នាំ២០២២-២០២៣៕