Update ៖ អំពើឃាតកម្មទាំងគ្រួសារនៅខេត្តមណ្ឌលគិរី! សមត្ថកិច្ចរកឃើញសពជនរងគ្រោះ២នាក់ទៀត សរុបអ្នកស្លាប់៥នាក់
ខេត្តមណ្ឌលគិរី ៖ អំពើឃាតកម្មនៅខេត្តមណ្ឌលគិរី សមត្ថកិច្ចបានបញ្ជាក់ថា សពជនរងគ្រោះចំនួន២នាក់ទៀត ត្រូវបានរកឃើញក្នុងនោះមានស្រីម្នាក់ ដូច្នេះជនរងគ្រោះដែលស្លាប់មានចំនួន៥នាក់ (ប្រុស៤នាក់ និងស្រីម្នាក់)។
លោក សូ សុវណ្ណ ស្នងការរងនគរបាលខេត្តមណ្ឌលគិរីបានឲ្យដឹងនៅព្រឹកថ្ងៃទី៣ ខែកុម្ភៈ ឆ្នាំ២០២២នេះថា សមត្ថកិច្ចបានរកឃើញសពជនរងគ្រោះ២នាក់ទៀត ដែលម្សិលមិញមានការអះអាងថា បាត់ខ្លួននោះ។ ជនរងគ្រោះទាំង២នាក់ គឺមានស្រីម្នាក់។
សមត្ថកិច្ចបានឲ្យដឹងថា ករណីឃាតកម្មនេះបានកើតឡើងនៅវេលាម៉ោង១១ និង៣០នាទី ថ្ងៃទី១ ខែកុម្ភៈ ឆ្នាំ២០២២ នៅចំណុចស្រែចោល ក្នុងភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី។ សមត្ថកិច្ចបញ្ជាក់ថា មូលហេតុ ឆ្លងតាមការស្រាវជ្រាវ ករណីនេះកើតឡើងដោយសារគំនុំ ហើយករណីនេះកម្លាំងជំនាញកំពុងស្រាវជ្រាវរកជនសង្ស័យបន្តនីតិវិធី។
សូមបញ្ជាក់ថា សពជនរងគ្រោះក្នុងគ្រួសារមួយ ត្រូវបានគេប្រទះឃើញស្លាប់នៅក្នុងព្រៃមួយ ស្ថិតនៅចំណុចស្រែម៉ាអ៊ែល ភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី នៅល្ងាចថ្ងៃទី០២ ខែកុម្ភៈ ឆ្នាំ២០២២៕
