ខេត្តមណ្ឌលគិរី ៖ វត្ថុតាងល្មើសធនធានធម្មជាតិត្រូវបានបង្ក្រាបជាបន្តបន្ទាប់ នាសប្តាហ៍ទីមួយនៃខែកុម្ភៈ ឆ្នាំ២០២២ ក្នុងដែនជម្រកការពារសត្វព្រៃកែវសីមា ក្រោមប្រតិបត្តិការរបស់មន្ត្រីឧទ្យានុរក្ស ប៉ុន្តែមន្ត្រីជំនាញប្រឈមមុខខ្លាំងនឹងក្រុមជនល្មើស ដែលលួចលាក់ចូលកាប់អារជ្រៀកឈើខុសច្បាប់។

សេចក្តីរាយការណ៍បានឲ្យដឹងថា នៅថ្ងៃទី០១ ខែកុម្ភៈ ឆ្នាំ២០២២ វេលាម៉ោង៤ល្ងាច លោក ហាន សាខន នាយកដែនជម្រកការពារសត្វព្រៃកែវសីមាបានដឹកនាំកម្លាំងជំនាញចំនួន១១នាក់ នៅចំណុចនិយាមកា (០៧០១០០៣-១៣៦៥១៨៤) ស្ថិតក្នុងភូមិពូគង់ ឃុំស្រែព្រះ ស្រុកកែវសីមា ខេត្តមណ្ឌលគិរី បានពើបប្រទះគំនរឈើអារស្រឡៅមួយគំនរ។ ក្រោយត្រួតពិនិត្យ និងស្រាវជ្រាវឆែកឆេរអត្តសញ្ញាណនៅជុំវិញបរិវេណកើតហេតុ ក្រុមការងារបានប្រទះឃើញរថយន្តអ៊ីហ្វាកែច្នៃមួយគ្រឿង ចំងាយពីទីតាំងគំនរឈើអារ ប្រហែល១៥០ម៉ែត្រ និងមានឈើកកោះឡាំងជ្រុងចំនួន០៦កំណាត់ នៅលើរថយន្តនោះផងដែរ។

តាមការសន្និដ្ឋានរបស់ក្រុមការងារ ជនប្រព្រឹត្តបទល្មើសអាចដឹងព័ត៌មានមុនពីសកម្មភាពក្រុមការងារទើបបែនទម្លាក់ឈើចោលរួចបើក ឡានយកមកលាក់ទុករួចរត់គេចខ្លួនមុនក្រុមការងារទៅដល់។ វត្ថុតាងដែលបានរឹបអូសរួមមានដូចជា៖១.រថយន្តអ៊ីហ្វាកែច្នៃ០១គ្រឿង ២.ឈើអារប្រភេទលេខ១ស្រឡៅចំនួន១១០សន្លឹក ៣.ឈើឡាំងជ្រុងប្រភេទលេខ១កកោះចំនួន០៦កំណាត់។ បច្ចុប្បន្នក្រុមការងារកំពុងយកវត្ថុតាងមករក្សាទុកនៅស្នាក់ការ កណ្តាលបណ្តាះអាសន្ន ដើម្បីបន្តរនីតិវិធីច្បាប់ ។

សូមបញ្ជាក់ថា ក្នុងប្រតិបត្តិការបង្ក្រាបបទល្មើសជាក់ស្តែងខាងលើមន្ត្រីជំនាញបានជួបផលលំបាកមួយចំនួន ដោយសារស្ថានភាពភូមិសាស្ត្រស្មុគស្មាញ ឆ្ងាយពីស្នាក់ការ ក្រុមការងារប្រឈមនឹងការលបឆ្មក់វាយប្រហារ ពេលសម្រាកយប់លឺស្នូអាវុធបាញ់ជាច្រើនគ្រាប់ ដោយកម្លាំងត្រៀមជានិច្ចមិនសូវបានសម្រាកទេ។

ប្រភពព័ត៌មានមិនទាន់ច្បាស់ការណ៍បានឲ្យដឹងថា ជនប្រព្រឹត្តបទល្មើសដែនបានគេចចេញពីទីតាំងកើតហេតុកំពុងគៀងគរប្រមូល គ្នីគ្នាដើម្បីរារាំងនៅពេលក្រុមការងារនាំវត្ថុតាងរថយន្តឆ្លងកាត់ទីប្រជុំជនឆ្ពោះទៅគោលដៅទីស្នាក់ការ និងបានបង្កប់ចម្រូង ដែកគោលធ្វើឲ្យផ្ទុះកង់ម៉ូតូ ដើម្បីបង្កជាឧបសគ្គដល់ក្រុមការងារ ។

ដោយឡែករថយន្តដែលបានរឹបអូសមានការខូចជាបន្តបន្ទាប់ បែកប៉ុង និងដាច់កាឡេ ជាដើម តាំងពីថ្ងៃបង្ក្រាបថ្ងៃទី០១ ខែមករា រហូតដល់ថ្ងៃទី០៣ ខែមករាឆ្នាំ២០២២ ការនាំរថយន្តដឹកឈើមិនទាន់ដល់គោលដៅទេ គឺពាក់កណ្តាលផ្លូវ ៕