សាលារាជធានីភ្នំពេញណែនាំឲ្យចាត់វិធានជាបន្ទាន់ ចំពោះការរកឃើញវិជ្ជមានកូវីដ១៩ បំប្លែងខ្លួនថ្មីជាបន្តបន្ទាប់លើក្រុមបាតុករអតីតបុគ្គលិកក្រុមហ៊ុន Naga World
ភ្នំពេញ ៖ សាលារាជធានីភ្នំពេញ នៅយប់ថ្ងៃទី០៦ ខែកុម្ភៈ ឆ្នាំ២០២២នេះ បានចេញសេចក្តីណែនាំស្តីពីការចាត់វិធានជាបន្ទាន់ចំពោះការរកឃើញវិជ្ជមានកូវីដ១៩ បំប្លែងខ្លួនថ្មីជាបន្តបន្ទាប់លើក្រុមបាតុករអតីតបុគ្គលិកក្រុមហ៊ុន Naga World ដោយក្នុងនោះគណៈកម្មការប្រយុទ្ធនឹងជំងឺកូវីដ១៩ ថ្នាក់រាជធានីភ្នំពេញ សូមធ្វើការណែនាំចំនួន ៥ចំណុចដូចខាងក្រោម។
សូមជម្រាបថា មន្ទីរសុខាភិបាលរាជធានីភ្នំពេញបានប្រកាសនៅថ្ងៃទី០៦ ខែកុម្ភៈ ឆ្នាំ២០២២ថា ក្រុមគ្រូពេទ្យមន្ទីរសុខាភិបាលនៃរដ្ឋបាល រាជធានីភ្នំពេញសហការជាមួយក្រុមគ្រូពេទ្យស្ម័គ្រចិត្តTYDA បានធ្វើតេស្តយកសំណាក ដើម្បីស្វែងរកមេរោគកូវីដ-១៩ លើក្រុមបាតុករអតីតបុគ្គលិកក្រុមហ៊ុនណាហ្គាវើលដ៏។ ជាលទ្ធផលគិតត្រឹមម៉ោង១៨:៤៥នាទីនៅល្ងាចថ្ងៃដដែលនេះមានបាតុករចំនួន២៩ នាក់បន្ថែមទៀត ត្រូវបានរកឃើញថាមានផ្ទុកមេរោគកូវីដ-១៩វិជ្ជមាន៕
