មណ្ឌលគិរី៖ ដើម្បីឲ្យប្រជាពលរដ្ឋដែលកំពុងខ្វះខាត មានជីវភាពរស់នៅមានលក្ខណៈសមរម្យ នាព្រឹកថ្ងៃទី១១ ខែមីនា ឆ្នាំ២០២២ ឯកឧត្តម ថង សាវុន អភិបាលខេត្តមណ្ឌលគិរី និងឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត រួមទាំងមានការចូលរួមពីសំណាក់លោក អភិបាលរងខេត្ត មន្ទីរអង្គភាពពាក់ព័ន្ធ និងអាជ្ញាធរស្រុកជាច្រើនរូប បានអញ្ជើញចុះជួបសំណេះសំណាល និងប្រគល់ផ្ទះជូនប្រជាពលរដ្ឋក្រីក្រចំនួន ២ខ្នងផ្ទះ ស្មើនឹង ០២គ្រួសារ ដែលមានទំហំ ៥គុណ ៦ម៉ែត្រ សាងសង់អំពីឈើ ប្រក់ស័ង្កសី ដែលជាអំណោយរបស់លោកឧត្តមសេនីយ៍ទោ ឡោ សុខា ស្នងការនគរបាលខេត្ត ស្ថិតនៅភូមិស្រែធំ ឃុំសុខសាន្ត ស្រុកកោះញែក។
ឯកឧត្តម ថង សាវុន អភិបាលខេត្ត បានមានប្រសាសន៍ពាំនាំនូវការផ្តាំផ្ញើសាកសួរសុខទុក្ខពីសម្តេច តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចទាំងទ្វេរតែងតែយកចិត្តទុកដាក់គិតគូរពីសុខុមាលភាពរស់នៅរបស់ប្រជាពលរដ្ឋទូទៅ ជាពិសេស ប្រជាពលរដ្ឋដែលកំពុងជួបការលំបាកខ្វះខាតក្នុងជីវភាពរស់នៅប្រចាំថ្ងៃ ដោយមិនប្រកាន់និន្នាការនយោបាយអ្វីឡើយ។ ឯកឧត្តម បញ្ជាក់ថា ផ្ទះចំនួន ២ខ្នង ដែលផ្តល់ជូនពលរដ្ឋក្រីក្រនាពេលនេះ គឺជាអំណោយដ៏ថ្លៃថ្លារបស់លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ក្នុងការជួយដល់ពលរដ្ឋ ដែលកំពុងត្រូវការជាក់ស្តែង ដើម្បីធ្វើយ៉ាងណា ឲ្យពួកគាត់មានកន្លែងរស់នៅមានលក្ខណៈសមរម្យ។ ឯកឧត្តម ក៏បានណែនាំដល់ប្រជាពលរដ្ឋទាំងអស់ ត្រូវកែប្រែទម្លាប់នៃការរស់នៅ ហើយចៀសវាងការកាប់បំផ្លាញ់ធនធានធម្មជាតិ និងបរបាញ់សត្វ ងាកមកប្រកបមុខរបរ ក្នុងការដាំដុះដំណាំរួមផ្សំ ការចិញ្ចឹមសត្វ និងមុខរបរផ្សេងៗទៀត ដើម្បីឲ្យជីវភាពរស់នៅកាន់តែល្អប្រសើរឡើង។ បន្ថែមលើសនេះ ឯកឧត្តម បានណែនាំដល់ពលរដ្ឋ ដែលទទួលបានផ្ទះថ្មីនេះ សូមជួយថែរក្សាផ្ទះទាំងនេះ ឲ្យបានល្អ និងសំអាតអនាម័យបរិស្ថានជុំវិញផ្ទះ ដោយប្រកាន់ភ្ជាប់នៃការរស់នៅស្អាត ហូបស្អាត និងផឹកស្អាត ជាពិសេស ត្រូវបន្តចូលរួមឲ្យបានខ្ជាប់ខ្ជួននូវវិធានការរបស់រាជរដ្ឋាភិបាលកម្ពុជា និងក្រសួងសុខាភិបាល ៣កុំ និង៣ការពារ ដើម្បីបង្ការទប់ស្កាត់ការរីករាលដាលនៃជំងឺកូវីដ-១៩ ហើយក៏សូមឲ្យប្រជាពលរដ្ឋ ដែលមិនទាន់ចាក់វ៉ាក់សាំងការពារជំងឺកូវីដ-១៩ សូមរួសរាន់ទៅចាក់វ៉ាក់សាំងនៅតាមទីតាំង ដែលរដ្ឋបាលក្រុង/ស្រុក បានកំណត់ជូនពលរដ្ឋ។
នាឳកាសនោះ ថ្នាក់ដឹកនាំខេត្ត ក៏បានឧបត្ថម្ភនូវគ្រឿងឧបភោគបរិភោគមួយចំនួន និងថវិកា ២០ម៉ឺនរៀល ផ្តល់ជូនគ្រួសារក្រីក្រចំនួន ០២គ្រួសារ ដោយឡែក សម្រាប់ប្រជាពលរដ្ឋដែលចូលរួម ទទួលបានសារុង ម្នាក់១ និងថវិកា ១ម៉ឺនរៀលផងដែរ៕