ព្រលឹងចុងសក់ ៖ រថយន្ត៥តោនដឹកកម្មករកម្មការិនីរោងចក្របើកបរលឿនជ្រុលចង្កូតក្រឡាប់បង្កឲ្យរបួសស្រាលធ្ងន់ច្រើននាក់
ខេត្តស្វាយរៀង ៖ យ៉ាងហោចណាស់កម្មករ កម្មការិនីរោងចក្រ៦៨នាក់បានរងរបួសធ្ងន់ និងស្រាលខណៈចេញពីធ្វើការត្រឡប់មកផ្ទះវិញ នាពេលយប់ហើយបានជួបគ្រោះថ្នាក់ចរាចរណ៍ក្រឡាប់រថយន្ត។ ករណីគ្រោះថ្នាក់ចរាចរណ៍នេះកើតឡើងកាលពីវេលាម៉ោង៦ និង៣០នាទីព្រលប់ថ្ងៃទី៣០ ខែមីនា ឆ្នាំ២០២២ នៅលើផ្លូវលេខ៣៣៤ ស្ថិតក្នុងភូមិត្រពាំងកំពិស ឃុំខ្សែត្រ ស្រុកកំពង់រោទិ៍ ខេត្តស្វាយរៀង។
យោងតាមសមត្ថកិច្ចបានឲ្យដឹងទៀតថា នៅមុនពេលកើតហេតុមានរថយន្ត ម៉ាកHyundai ចំណុះ៥តោន ពណ៌ស ផ្លាកលេខស្វាយរៀង 3A-2458 ដឹកកម្មករ កម្មការិនីរោងចក្រចំនួន៦៨នាក់ធ្វើដំណើរពីទិសដៅពីកើតទៅលិចតាមផ្លូវជាតិលេខ៣៣៤ដើម្បីដាក់ក្រុមកម្មករ កម្មការិនីតាមផ្ទះ។
ប្រភពបានបន្តទៀតថា លុះមកដលចំណុចកើតហេតុខាងលើរថយន្ត ដឹកកម្មករកម្មការិនីរោងចក្របានវ៉ា ជែងរថយន្តមួយគ្រឿងទៀត ក្នុងស្ថានភាពគ្រោះថ្នាក់បណ្ដាលឲ្យរថយន្តផ្អៀងធ្លាក់ចិញ្ចើមថ្នល់ខាងត្បូងថ្នល់បណ្តាលឲ្យមានអ្នករបួសធ្ងន់ស្រាលសរុប១៨នាក់ ប្រុស១នាក់ របួសធ្ងន់៣នាក់ស្រីត្រូវបានសមត្ថកិច្ចហៅរថយន្តសង្គ្រោះដឹកជញ្ជូនអ្នករងរបួសទៅកាន់មន្ទីរពេទ្យស្រុកស្វាយទាបដើម្បីសង្គ្រោះ។
សមត្ថកិច្ចបានបញ្ចាក់ថា អ្នកបើកបររថយន្តមានឈ្មោះ ម៉ឹក រតនា ភេទប្រុស អាយុ២៤ឆ្នាំ មានទីលំនៅភូមិបន្ទាយក្រាំង ឃុំបន្ទាយក្រាំង ស្រុកកំពង់រោទិ៍ ខេត្តស្វាយរៀង មុខរបរអ្នកបើកបររថយន្តដឹកកម្មករ បើកបរគ្មានរបួស ក្រោយពីជួបគ្រោះថ្នាក់ចរាចរណ៍រួចមក អ្នកបើកបររថយន្តរត់គេចខ្លួនបាត់ពីកន្លែង កើតហេតុ៕
