ខេត្តបន្ទាយមានជ័យ ៖ នាថ្ងៃទី០៨ ខែមេសា ឆ្នាំ២០២២នេះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីភាពដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តបន្ទាយមានជ័យ នៅសាលាខេត្ត ដោយមានការអញ្ជើញចូលរួមពី ឯកឧត្តម លោកជំទាវអភិបាលរងខេត្ត ប្រធានសាលា ដំបូង ព្រះរាជអាជ្ញាអមសាលាដំបូង ស្នងការ មេបញ្ជាការគ្រប់កងឯកភាព មន្ទីរអង្គភាព អភិបាលក្រុង/ស្រុក និងនាយកទីចាត់ការអង្គភាពចំណុះសាលាខេត្ត។

កិច្ចប្រជុំគណៈបញ្ជាការឯកភាពរដ្ឋបាលខេត្តមានរបៀបវរៈមួយចំនួន ៖

១,ការងាររៀបចំបុណ្យចូលឆ្នាំថ្មីប្រពៃណីជាតិខ្មែរ

២,ការងាររៀបចំសន្តិសុខ សណ្តាប់ធ្នាប់ក្នុងថ្ងៃបុណ្យចូលឆ្នាំថ្មី និង ការងារសន្តិសុខ សណ្តាប់ធ្នាប់សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ។

៣,ផ្សព្វផ្សាយសេចក្តីជូនដំណឹងសេចក្តីពីការចុះចាក់វ៉ាក់សាំង ការពារជំងឺកូវីដ១៩ នៅតាមទីកន្លែងកម្សាន្តសប្បាយ

ទីវត្តអារាម ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

៤,ផ្សព្វផ្សាយខ្លឹមសារសន្និបាតបូកសរុបការងារប្រយុទ្ធប្រឆាំងគ្រឿងញៀន និង អានសេចក្តីសម្រេចរបស់រដ្ឋបាលខេត្តស្តីពីការកែសម្រួលសមាសភាពគណៈកម្មាធិការត្រួតពិនិត្យគ្រឿងញៀនខេត្ត។

៥.បញ្ហាផ្សេង។

ថ្លែងក្នុងកិច្ចប្រជុំនោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ មានប្រសាសន៍ថា ដោយស្ថានភាពនៃការរីករាលនៃជំងឺកូវីដ១៩ បច្ចុប្បន្នក្នុងប្រទេសកម្ពុជាយើង មានភាពធូរស្រាល ក្រោមការដឹកនាំប្រកបដោយឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី ហើយរាជរដ្ឋាភិបាលបានអនុញ្ញាត្តបើកឲ្យមានរៀបចំកម្មវិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីបង្ករលក្ខណៈកម្សាន្តសប្បាយជូនប្រជាពលរដ្ឋ។ ដូច្នេះហើយ ខេត្តបានរៀបចំតុបតែងទីកន្លែងកម្សាន្តមួយចំនួន ជូនបងប្អូនលេងកម្សាន្តសប្បាយ។

ជាមួយគ្នានេះ ដើម្បីឲ្យដំណើរការរៀបចំបុណ្យចូលឆ្នាំថ្មីប្រពៃណីជាតិខ្មែរ ក្នុងភូមិសាស្ត្រខេត្តអោយប្រព្រឹត្តិទៅដោយភាពរលូននោះ ក្នុងនាមគណៈបញ្ជាការឯកភាពរដ្ឋបាលខេត្ត ស្នើដល់មេបញ្ជាការ ស្នងការ កងកម្លាំងគ្រប់ផ្នែកពាក់ព័ន្ធ និងអាជ្ញាធរដែនដីគ្រប់ថ្នាក់ សូមចូលរួមផ្សព្វផ្សាយ និងពង្រឹងការអនុវត្តន៍វិធានការការពារសន្តិសុខ សណ្តាប់ធ្នាប់សាធារណៈគ្រប់ទីកន្លែងទាំងក្នុងភូមិសាស្ត្រខេត្ត និងតាមខ្សែបន្ទាត់ព្រំដែនឲ្យបានតឹងរឹង ធានាបានក្តីសុខសប្បាយ ពុកម៉ែបងប្អូនប្រជាពលរដ្ឋ។

ឯកឧត្តមអភិបាលខេត្តបន្ទាយមានជ័យ បានជំរុញដល់អាជ្ញាធរក្រុង/ស្រុក និងមន្ទីរសុខាភិបាលនៃរដ្ឋបាលខេត្ត សូមបន្តរៀបចំ អនុវត្តន៍ឲ្យបានជោគជ័យនៃការចុះចាក់វ៉ាក់សាំងការពារជំងឺកូវីដ១៩ នៅតាមទីកន្លែងកម្សាន្តសប្បាយ ទីវត្តអារាម ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងចូលរួមជួយគាំទ្រដល់ការដឹកនាំរៀបចំពិធីបុណ្យចូលឆ្នាំតាមទីកន្លែង និងវត្តអារាមនានាក្នុងដែនសមត្ថកិច្ចរបស់ខ្លួនដោយគោរពតាមការណែនាំរបស់ក្រសួងសុខាភិបាល៕