ក្នុងខែមេសា អាជ្ញាធរជាតិអប្សរាបានអនុញ្ញាតការជួសជុលផ្ទះ និងសាងសង់សំណងតូចតាចចំនួន៦៦៣គ្រួសារ
ខេត្តសៀមរាប ៖ ក្នុងរយៈពេលពេញ១ខែមេសា ឆ្នាំ២០២២នេះ ក្រុមការងារជំនាញនៃនាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ បានចុះពិនិត្យលក្ខខណ្ឌនៃការរស់នៅ និងប្រើប្រាស់ទីតាំងស្នើសុំរបស់ប្រជាពលរដ្ឋបានចំនួន៦៦៣គ្រួសារ រួមមាន៖ ក្រុងសៀមរាប១៩៦គ្រួសារ ស្រុកបន្ទាយស្រី១២១ ស្រុកប្រាសាទបាគង១៤១គ្រួសារ ស្រុកពួក១១៥គ្រួសារ ស្រុកសូទ្រនិគម០៦គ្រួសារ និងស្រុកស្វាយលើ២២គ្រួសារ។
ដោយឡែកក្នុងរយៈពេលដូចគ្នានេះដែរ ប្រជាពលរដ្ឋដែលមានលក្ខខណ្ឌគ្រប់គ្រាន់ដើម្បីទទួលបានការអនុញ្ញាត ក្រុមការងារផ្នែកស្ថាបត្យកម្មបានជួយរៀបចំគំនូសប្លង់បានចំនួន៥០គ្រួសារ រួមមាន៖ ស្រុកអង្គរធំ០៥គ្រួសារ ក្រុងសៀមរាប០៧គ្រួសារ ស្រុកប្រាសាទបាគង១៧គ្រួសារ ស្រុកពួក១៣គ្រួសារ ស្រុកបន្ទាយស្រី០៦គ្រួសារ និងស្រុកស្វាយលើ០២គ្រួសារ។
អាជ្ញាធរជាតិអប្សរា តែងយកចិត្តទុកដាក់និងពិនិត្យ ព្រមទាំងពង្រឹងការងាររបស់ខ្លួនបន្ថែម តាំងពីដំណាក់កាលទទួលសំណើរហូតដល់ដំណាក់កាលឆ្លើយតបទៅកាន់ពលរដ្ឋវិញ ពោល គឺធ្វើយ៉ាងណាឱ្យសេវាកម្មរបស់អាជ្ញាធរជាតិអប្សរាខិតកាន់តែជិតប្រជាពលរដ្ឋ។
សូមបញ្ជាក់ថា រាល់ការស្នើសុំច្បាប់ជួសជុល គឺពុំមានការបង់ប្រាក់ទេ៕
