អភិបាលខេត្តមណ្ឌលគិរីស្តីទីអនុញ្ញាតស្ថានទូតអង់គ្លេស ចូលជួបសំដែងការគួរសម និងពិភាក្សាការងារ
ខេត្តមណ្ឌលគិរី ៖ នារសៀលថ្ងៃទី២៩ ខែមេសា ឆ្នាំ២០២២ លោក ជាក់ ម៉េងហ៊ាង អភិបាលខេត្តមណ្ឌលគិរីស្តីទី បានអនុញ្ញាតឲ្យលោកស្រី ទីមស៊ីន បាឡាត នាយករង នៃធម្មជាតិ អាកាសធាតុ និងការអភិវឌ្ឍអន្តរជាតិ និងគណៈប្រតិភូ ចូលជួបសំដែងការគួរសម និងពិភាក្សាការងារមួយចំនួន ដោយមានការចូលរួមពីសំណាក់លោកស្រី ជុំ ណារី នាយករងរដ្ឋបាលសាលាខេត្ត លោក អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក អនុប្រធានមន្ទីរបរិស្ថានខេត្ត ដែលប្រព្រឹត្តទៅនៅសាលប្រជុំសាលាខេត្តមណ្ឌលគិរី។
លោក ជាក់ ម៉េងហ៊ាង បានសម្តែងនូវការស្វាគមន៍ដ៏កក់ក្តៅដល់ស្ថាទូតអង់គ្លេសប្រចាំនៅរាជធានីភ្នំពេញ ដែលបានអញ្ជើញមកទឹកដីនៃខេត្តមណ្ឌលគិរី។ លោក អភិបាលខេត្តស្តីទី ក៏បានជម្រាបជូនពីលក្ខណៈភូមិសាស្រ្ត និងការរីកចម្រើនរបស់ខេត្តមណ្ឌលគិរី ជូនគណៈប្រតិភូជ្រាប។
ក្នុងដំណើរទស្សនកិច្ចរបស់ស្ថានទូតអង់គ្លេសប្រចាំនៅរាជធានីភ្នំពេញ ចង់បង្ហាញអំពីកម្មវិធី BLF ស្វែងយល់អំពីបញ្ហាប្រឈមនៃការគ្រប់គ្រងធនធានធម្មជាតិ និងពិភាក្សាអំពីកាលានុវត្តភាព និងការចូលរួមសហការនាពេលអនាគតជាមួយដៃគូពាក់ព័ន្ធនានា។ លោកស្រី ទីមស៊ីន បាឡាត នាយករង នៃធម្មជាតិ អាកាសធាតុ និងការអភិវឌ្ឍអន្តរជាតិ បានបញ្ជាក់ថា គោលបំណង ដើម្បីកាត់បន្ថយភាពក្រីក្រ ការពារ និងស្តារឡើងវិញធនធានជីវៈចម្រុះ និងកាត់បន្ថយផលប៉ះពាល់នៃការប្រែប្រួលអាកាសធាតុ ក្នុងតំបន់ទេសភាពសំខាន់ៗចំនួន០៦ នៅទូទៅសកលលោក៕
