ក្រុមឈ្មួញរកស៊ីឈើនៅចំណុចខ្មែរអង្គរអស់ល័ក្ខណ៍ត្រូវសមត្ថកិច្ចបង្ក្រាបបាន
ខេត្តមណ្ឌលគិរី ៖ ថ្ងៃអាទិត្យ១ កើត ខែពិសាខ ឆ្នាំខាលចត្វាសក័ព.ស២៥៦៦ត្រូវនឹងថ្ងៃទី០១ ខែឧសភា ឆ្នាំ២០២២ វេលាម៉ោង២៣ ៖ ០០នាទី កម្លាំងការិយាល័យជំនាញបង្រ្កាបបទល្មើសសេដ្ឋកិច្ចខេត្តមណ្ឌលគិរីបានសហការជាមួយកម្លាំងនគរបាលប៉ុស្តិ៍រដ្ឋបាលស្រែឈូក កម្លាំងដែនជម្រកសត្វព្រៃកែវសីមាស្នាក់ការរងដើមចំបក់បានចុះប្រតិបត្តិការបង្រ្កាបទប់ស្កាត់បទល្មើសធនធានធម្មជាតិនៅចំណុចផ្លូវបំបែកគូស ស្ថិតក្នុងភូមិព្រះ ឃុំស្រែឈូក ស្រុកកែវសីមា ខេត្តមណ្ឌលគិរី។
បើតាមសមត្ថកិច្ចឲ្យដឹងថា ក្នុងការចុះប្រតិបត្តិការនេះកម្លាំបានរុករកឃើញឈើប្រភេទសុក្រំអារប្រាំបីជ្រុងចំនួន១៩ដើម រថយន្តសាំងយ៉ុងពណ៌ស ចំនួន២គ្រឿង ពាក់ផ្លាកលេខ 2A 5030 មួយទៀតគ្មានផ្លាកលេខ និងរថយន្តប៉ាកុងកែច្នៃចំនួន២គ្រឿង។ រីឯក្រុមល្មើសបានរត់គេចខ្លួនទុកចោលវត្ថុតាងនៅហ្នឹងកន្លែង។ លុះដល់ថ្ងៃទី២ ខែឧសភា ឆ្នាំ២០២២ វេលាម៉ោង ០៧ ៖ ៣០ទើបកម្លាំងជំនាញបានប្រមូលវត្ថុតាងនិងដឹកជញ្ជូន យកទៅរក្សាទុកនៅដែនជម្រកសត្វព្រៃកែវសីមា ស្នាក់ការរង ចំបក់ចាត់ការនីតិវិធីច្បាប់៕
