ខេត្តមណ្ឌលគិរី ៖ នៅព្រឹកថ្ងៃទី ០៥ ខែឧសភា ឆ្នាំ ២០២២ រដ្ឋបាលខេត្តមណ្ឌលគីរី បើកកិច្ចប្រជុំសាមញ្ញក្រុមប្រឹក្សាខេត្ត លើកទី៣៥ អាណត្តិទី៣ ក្រោមអធិបតីភាពឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត ឯកឧត្តម ថង សាវុន អភិបាលខេត្តមណ្ឌលគិរី ដោយមានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រីប្រធាន មន្ទីរ អង្គភាពជុំវិញខេត្ត អភិបាល អភិបាលរងក្រុង ស្រុក មេបញ្ជាការកងកម្លាំងប្រដាប់អាវុធទាំង៣ប្រភេទ នាយករងរដ្ឋបាល នាយក នាយករងទីចាត់ការសាលាខេត្ត ដែលកិច្ចប្រជុំនេះធ្វើឡើងនៅអាគារក្រុមប្រឹក្សាខេត្តមណ្ឌលគិរី ។

ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី មានប្រសាសន៍ថា កិច្ចប្រជុំសាមញ្ញក្រុមប្រឹក្សាខេត្ត លើកទី ៣៥ អាណត្តិទី៣ នេះ នឹងពិនិត្យពិភាក្សា អនុម័តលើរបាយការណ៍ប្រចាំខែមេសាឆ្នាំ ២០២២ និង របាយការណ៍ត្រីមាសទី១ ឆ្នាំ២០២២ ព្រមទាំងបញ្ហាផ្សេងៗទៀត ។ ឯកឧត្តមប្រធានក្រុមប្រឹក្សា បានវាយតម្លៃខ្ពស់ និងកោតសរសើរដល់កិច្ចខិតខំប្រឹងប្រែងរបស់គណៈអភិបាលខេត្ត មន្ទីរអង្គភាពជុំវិញខេត្ត អាជ្ញាធរក្រុង ស្រុក កងកម្លាំងប្រដាប់អាវុធ ដែលបានសហការគ្នាយ៉ាងល្អក្នុងការរៀបចំសង្ក្រានសែនមនោរម្យ ដូចជាការរៀបចំសន្តិសុខ សណ្ដាប់ធ្នាប់និងរបៀបរៀបរយល្អ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរកន្លងទៅ ។

ឯកឧត្តមក៏បានជំរុញដល់មន្ទីរសុខាភិបាល និងអាជ្ញាធរមូលដ្ឋាន ឲ្យបន្តសហការគ្នាក្នុងការចុះចាក់វ៉ាក់សាំងការពារជំងឺកូវីដ-១៩ជូនប្រជាពលរដ្ឋនៅតាមខ្នងផ្ទះ តាមសាលារៀន និងចាក់ជូនកម្មករ ពលករនៅតាមបណ្ដាក្រុមហ៊ុននានា ដើម្បីការពារសុខភាពសាធារណៈ អាយុជីវិតរបស់ប្រជាពលរដ្ឋ ។ ម្យ៉ាងទៀតឯកឧត្តម ក៏បានណែនាំដល់អភិបាលក្រុងស្រុកទាំង ៥ ត្រូវធ្វើការប្រជុំណែនាំដល់មេឃុំ ចៅសង្កាត់ទាំងអស់ ត្រូវពិនិត្យតាមដាន និងចេញលិខិតបញ្ជាក់អត្តសញ្ញាណប័ណ្ណបម្រើឲ្យការចុះឈ្មោះបោះឆ្នោត និង ការបោះឆ្នោត ដល់ប្រជាពលរដ្ឋនៅក្នុងមូលដ្ឋានរបស់ខ្លួន ដើម្បីឲ្យពួកគាត់មានសិទ្ធិពេញលេញក្នុងការចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ ។

ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី បានជម្រាបជូនអង្គប្រជុំពីសកម្មភាពការងារ លទ្ឋផលការងារដែលសម្រេចបានរបស់គណៈអភិបាលខេត្តក្នុងរយៈពេល១ខែកន្លងទៅ និងបានជម្រាបជូនពីផែនការសកម្មភាពដែលនឹងត្រូវអនុវត្តបន្តនៅក្នុងខែឧសភា នេះ ។ ឯកឧត្តមក៏បានស្នើដល់មន្ទីរអង្គភាពអាជ្ញាធរក្រុង ស្រុក ត្រូវបន្តយកចិត្តទុកដាក់បំពេញការងារប្រចាំថ្ងៃ ការងាររបាយការណ៍របស់ខ្លួនអោយបានល្អថែមទៀត ជាពិសេសរបាយការណ៍ដាក់ជូនកិច្ចប្រជុំក្រុមប្រឹក្សាខេត្ត ។ ក្រៅពីនេះ សូមឱ្យមន្ទីរ សុខាភិបាល អាជ្ញាធរពាក់ព័ន្ធ បន្តការចុះចាក់វ៉ាក់សាំង និងធ្វើការផ្សព្វផ្សាយដល់ប្រជាពលរដ្ឋឱ្យមកចាក់វ៉ាក់សាំងដូសជំរុញ ដូសទី៤ ព្រមទាំងត្រូវនាំកូនតូចៗចាប់ពីអាយុ៣ឆ្នាំឡើង ទៅចាក់វ៉ាក់សាំងការពារជំងឺកូវីដ-១៩ ៕