ក្រសួងបរិស្ថាន បន្តដាំកូនឈើ១៥០០០ដើម នៅតំបន់ព្រៃលិចទឹកតំបន់៣ នៃតំបន់បឹងទន្លេសាប
ខេត្តសៀមរាប ៖ ក្រសួងបរិស្ថាន បន្តដាំកូនឈើ១៥០០០ដើម នៅតំបន់ព្រៃលិចទឹកតំបន់៣ នៃតំបន់បឹងទន្លេសាប ក្នុងភូមិសាស្រ្តខេត្តសៀមរាប ក្រោមអធិបតីភាព ឯកឧត្តម សេន ណាស៊ី អនុរដ្ឋលេខាធិការក្រសួងបរិស្ថានដោយមានការចូលរួមពីថ្នាក់ដឹកនាំក្រសួង តំណាងគណៈអភិបាលខេត្តសៀមរាប មន្ទីរពាក់ព័ន្ធ កងកម្លាំងប្រដាប់អាវុធគ្រប់ប្រភេទ អាជ្ញាធរមូលដ្ឋាន យុវជន ប្រជាពលរដ្ធ និងសិស្សានុសិស្សជាច្រើននាក់ នាព្រឹកថ្ងៃទី៥ ខែឧសភា ឆ្នាំ២០២២ នៅភូមិទី៦ សង្កាត់ចុងឃ្នាស់ ក្រុងសៀមរាប ខេត្តសៀមរាប។
ឯកឧត្តម ពិន ប្រាកដ អភិបាលរងនៃគណអភិបាលខេត្តសៀមរាប បានឱ្យដឹងថា ស្របតាមយុទ្ធសាស្រ្តរបស់រាជរដ្ឋាភិបាលកម្ពុជា រដ្ឋបាលខេត្តសៀមរាប បានចូលរួមការពារ និងអភិរក្សព្រៃលិចទឹកតំបន់៣ ក្នុងភូមិសាស្រ្តខេត្តសៀមរាន ដើម្បីធ្វើឱ្យមានជីវៈចម្រុះសម្បូរបែប លើកស្ទួយជីវភាពសហគមន៍ឲ្យរុងរឿង និងចូលរួមអភិវឌ្ឍសេដ្ឋកិច្ចជាតិ ។
ឯកឧត្តម សេន ណាស៊ី បានលើកឡើងថា ការដាំស្តារឡើងវិញដើមឈើនៅតំបន់ព្រៃលិចទឹកតំបន់៣បឹងទន្លេសាប ស្របនឹងការប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ក្រោមប្រធានបទថែភពផែនដី ដើម្បីសុខភាពយើង ដែលបំផុសគំនិតចូលរួមថែរក្សាព្រៃឈើឱ្យបានគង់វង្ស ដែលជាប្រយោជន៍ដល់អ្នកជំនាន់ក្រោយ។ ឯកឧត្តមអនុរដ្ឋលេខាធិការ បានចាត់ទុកថាការចូលរួមពីអ្នកពាក់ព័ន្ធដាំស្តារព្រៃលិចទឹក គឺការទទួលខុសត្រូវ លើការគ្រប់គ្រងធនធានធម្មជាតិ អនាគតភូមិ ឃុំ និងជាជោគវាសនានៃមាតុភូមិយើង។
សូមបញ្ជាក់ថា នេះជាលើកទី២ ដែលការដាំស្តារឡើងវិញនៅតំបន់ព្រៃលិចទឹកតំបន់៣ នៃតំបន់បឹងទន្លេសាប រៀបចំក្នុងភូមិសាស្រ្តខេត្តសៀមរាប ដោយមានកូនឈើ១៥០០០ដើម រួមមានដើមសណ្តាន់ និងម្តេញ នៅលើដីចំនួន៣៥ហិកតា។
ក្រសួងបរិស្ថានសហការជាមួយរដ្ឋបាលខេត្តសៀមរាប បានរៀបចំដាំស្តារព្រៃលិចទឹកនៅតំបន់៣នៃបឹងទន្លេសាប លើកទី១ ថ្ងៃទី២៥ ខែមករា ឆ្នាំ២០២២ មានកូនឈើចំនួន២០០០ដើម លើដីទំហំ៥ហិកតា៕
