ខេត្តព្រះសីហនុ ៖ ក្រសួងយុត្តិធម៌បានរៀបចំសិក្ខាសាលាស្តីពី «វិជ្ជាជីវៈ អាជ្ញាសាលា» នៅសាលប្រជុំសណ្ឋាគារ និងភោជនីយដ្ឋានឆ្នេរថ្មី ក្រោមអធិបតីភាព ឯកឧត្តម សួន វិសាល រដ្ឋលេខាធិការក្រសួងយុត្តិធម៌នឹងមានការចូលរួមពី លោកស្រី ហៀក ហ៊ីមុល្លី អភិបាលរងខេត្តព្រះសីហនុ កងកម្លាំងប្រដាប់អាវុធ និងមន្ទីរអង្គភាពពាក់ព័ន្ធជាច្រើននាក់នៅព្រឹក ថ្ងៃទី០៤ ខែសីហា ឆ្នាំ២០២២ ។

លោកស្រី ហៀក ហ៊ីមុល្លី អភិបាលរងខេត្តព្រះសីហនុ តំណាងឱ្យឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានមានប្រសាសន៍ថា តាំងនាមរដ្ឋបាលខេត្តព្រះសីហនុ សូមថ្លែងអំណរគុណយ៉ាងជ្រាលជ្រៅ ដល់ក្រុមការងារក្រសួងយុត្តិធម៌ ដែលបានរៀបចំសិក្ខាសាលាដ៏មានសារសំខាន់នេះជូនដល់សមត្ថកិច្ច ស្នងការដ្ឋាននគរបាលខេត្ត បញ្ជាការកងរាជអាវុធហត្ថ មន្ទីរពាក់ព័ន្ធក្នុងខេត្ត អធិការដ្ឋាននគរបាលក្រុង បញ្ជាការមូលដ្ឋានកងរាជអាវុធហត្ថក្រុង សាលាសង្កាត់ និងប៉ុស្តិ៍នគរបាលរដ្ឋបាលក្រុងព្រះសីហនុ ដើម្បីគោលបំណងផ្សព្វផ្សាយវិជ្ជាជីវៈអាជ្ញាសាលាឱ្យបានទូលំទូលាយ និងបញ្រ្ជាបការយល់ដឹងអំពីតួនាទី ភារកិច្ចសិទ្ធិអំណាច និងការអនុវត្តដោយបង្ខំរបស់អាជ្ញាសាលាដល់មន្រ្តីអនុវត្តច្បាប់ដែលពាក់ព័ន្ធ។

លោកស្រីអភិបាលរងខេត្តបានបន្តថា ខ្ញុំសង្ឃឹមថា លោក លោកស្រី ដែលមានវត្តមាននៅទីនេះទាំងអស់និងពង្រីកពង្រឹងការយល់ដឹងឱ្យមានភាពសុក្រឹតយុត្តិធម៌ថែមទៀត តាមរយៈដំណើរការសិក្ខាសាលានៅថ្ងៃនេះ។ ហើយចំណេះដឹងទាំងនេះ គឺជាប្រយោជន៍សម្រាប់ការសហការ និងការអនុវត្តទៅតាមតួនាទីភារកិច្ចរបស់ខ្លួននៅក្នុងខេត្តព្រះសីហនុរបស់យើងទាំងអស់គ្នា។

ឯកឧត្តម សួន វិសាល រដ្ឋលេខាធិការក្រសួងយុត្តិធម៌ មានប្រសាសន៍ថា ការរៀបចំសិក្ខាសាលានេះ គោលបំណង ដើម្បីអោយមន្រ្តីអនុវត្តច្បាប់របស់យល់ដឹងអំពីសារសំខាន់ នៃតួនាទីរបស់អាជ្ញាសាលា ព្រោះកន្លងមកបញ្ហាប្រឈមអាចកើតឡើងមួយចំនួននៅពេលដែលអាជ្ញាសាលាបានអនុវត្តបំពេញការងារនៅតាមសាលាដំបូងនីមួយៗ ឃើញថាសមត្ថកិច្ចរបស់យើងមិនទាន់យល់ថាតើអាជ្ញាសាលាមានតួនាទីធ្វើអ្វីខ្លះ។

ឯកឧត្តមបន្តទៀតថា បច្ចុប្បន្នក្រសួងកំពុងតែយកចិត្តទុកដាក់ ដើម្បីឱ្យតួនាទីនេះ មានការរីកចម្រើន ដោយក្រសួងកំពុងតែព្រៀងច្បាប់ លក្ខន្តិកៈរបស់អាជ្ញាសាលា ដើម្បីឱ្យតួនាទីនេះកាន់តែច្បាស់លាស់ជាងមុន។ ហើយតាមរយៈសិក្ខាសាលានេះ ក៏ជាចំណែកមួយដ៏សំខាន់សម្រាប់អ្នកអនុវត្តផ្ទាល់លើកនៅបញ្ហា ហើយយើងនឹងយកចំណុចសំខាន់មួយចំនួនបញ្ចូលទៅក្នុងសេចក្ដីព្រៀងច្បាប់របស់យើង។ ដូច្នេះសូមឱ្យសិក្ខាសាលានេះ មានការពិភាក្សាមតិគ្នាឱ្យបានដិតដល់ស៊ីជម្រៅ និងហ៊ានលើកបញ្ហាទាំងអស់ដែលជួបប្រទះ ងាយស្រួលដល់ក្រសួង ក៏ដូចជាក្រុមការងារបញ្ចូលទៅក្នុងសេចក្តីព្រៀងច្បាប់ សម្រាប់យកទៅអនុវត្តឲ្យបានល្អប្រសើរ៕