មន្រ្តីជំនាញចុះពិនិត្យស្ថានីយប្រេងឥន្ធនៈ២ទីតាំង ដើម្បីធានា និងការពារផលប្រយោជន៍របស់អ្នកប្រើប្រាស់
ខេត្តមណ្ឌលគិរី៖ ដោយទទួលបានការណែនាំពីឯកឧត្ដម ម៉ម វ៉ាន់ដា ព្រះរាជអាជ្ញានៃអយ្យការអមសាលាដំបូងខេត្តមណ្ឌលគិរី លោក ស៊ាវ ងីឈាន់ ព្រះរាជអាជ្ញារង នៃអយ្យការអមសាលាដំបូងខេត្តមណ្ឌលគិរី បានដឹកនាំ និងសម្របសម្រួលមន្ត្រីជំនាញនៃមន្ទីរពាណិជ្ជកម្មខេត្តមណ្ឌលគិរី និងមន្រ្តីសាខា កបប ខេត្តមណ្ឌលគិរី ក្រុមការងារបានចុះទៅពិនិត្យដល់ទីតាំងនូវស្ថានីយប្រេងឥន្ធនៈចំនួន២ទីតាំង។ សមាសភាពចូលរួម លោក លឹម ស្រេង ប្រធានមន្ទីរពាណិជ្ជកម្ម លោក ម៉ោញ ជី អនុប្រធានមន្ទីរ លោក ប៉ុល សាវតា អនុប្រធានសាខា លោក ណាល់ លីនណា ប្រធានការិយាល័យ។
ទីតាំងនូវស្ថានីយប្រេងឥន្ធនៈចំនួន២ទីតាំងរួមមាន៖ ទី១ ស្ថានីយប្រេងឥន្ទនៈតេលា (TELA) ដែលមានឈ្មោះ ហ៊ាន វណ្ណដា ជាអ្នកទទួលខុសត្រូវ។ ទី២ ដេប៉ូប្រេងឥន្ទនៈតេលា (TELA) ដែលមានឈ្មោះ ចូវ វណ្ណា ជាអ្នកទទួលខុសត្រូវ។
តាមការពិនិត្យរបស់មន្រ្តីជំនាញឃើញថា ស្ថានីយប្រេងឥន្ទនៈទាំង០២ទីតាំងខាងលើនេះ គឺបរិមាណប្រេងមានភាពអនុលោមតាមបទដ្ឋានព័ត៌មាន សម្រាប់អ្នកប្រើប្រាស់ និងពុំមានសារធាតុទឹកនៅក្នុងប្រេងសាំង ឬប្រេងម៉ាស៊ូតទេ។ មន្ត្រីជំនាញបានសម្រេចយកសំណាកគំរូប្រេងឥន្ទនៈ នូវប្រភេទប្រេងសាំងធម្មតា ប្រេងសាំងស៊ុបពែ និងប្រេងម៉ាស៊ូត ដើម្បីយកទៅធ្វើពិសោធន៍នៅអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ។
សូមជម្រាបថា ការចុះពិនិត្យស្ថានីយប្រេងឥន្ធនៈនេះគឺធ្វើឡើងដើម្បីធានា និងការពារផលប្រយោជន៍របស់អ្នកប្រើប្រាស់៕
