ខេត្តមណ្ឌលគិរី៖ ល្ហុងហូឡេនដែលបានដាំដុះលើផ្ទៃដីដ៏មានជីវជាតិនៃខេត្តមណ្ឌលគិរី កំពុងមានតម្រូវការបញ្ជាទិញខ្ពស់ ខណៈដែលដំណាំប្រភេទនេះមានកសិករតិចតួចនៅឡើយកំពុងដាំដុះ និងប្រមូលផលលក់ចេញទៅទីផ្សារខាងក្រៅ ។
លោក ម៉ុយ រ៉ាដូ ជាកសិករមួយរូបដាំដុះដំណាំជាច្រើនប្រភេទក្នុងចំការមួយមានទីតាំងនៅឃុំពូជ្រៃ ស្រុកពេជ្រាដា ខេត្តមណ្ឌលគិរី បានលើកឡើងថា បច្ចុប្បន្នេះលោកបានដាំដុះបន្លែផ្លែឈើ និងចិញ្ចឹមសត្វជាច្រើនប្រភេទ ប៉ុន្តែលោកបានផ្ដោតទៅលើពូជល្ហុងហូឡេនជាចម្បង ដែលនាំចូលពីប្រទេសថៃ ។ លោកបានដាំដុះល្ហុងហូឡេននេះ ៣ឆ្នាំមកហើយ លើផ្ទៃដីប្រមាណ៤ហិកតា ស្មើនិង៤៤០០ដើម ។
លោកបន្តថា ដំណាំល្ហុងហូឡេនជាប្រភេទដំណាំដែលពុំមានកសិករណាម្នាក់ដាំដុះនោះទេក្នុងខេត្តមណ្ឌលគិរី ហើយនេះក៏ជាមូលហេតុដែលលោកបានសាកល្បងយកពូជដំណាំល្ហុងហូឡេន មកបង្កបង្កើនផលរហូតទទួលបានជោគជ័យ។ លោក ម៉ុយ រ៉ាដូ លើកឡើងទៀតថា លោកចូលចិត្តតាមដានព័ត៌មានអំពីកសិកម្មណាស់ ហើយបានសម្គាល់ឃើញល្ហងហូឡេនមានទីផ្សារខ្ពស់ តែបែរជាគ្មានអ្នកដាំដុះ ដូចនេះលោកក៏ជ្រើសយកដំណាំមួយនេះមកដាំ ហើយនៅពេលបង្កបង្កើនផលដំបូងក៏មានក្រុមហ៊ុននានាមកសុំចុះកុងត្រាបញ្ជាទិញផងដែរ តែលោកមិនបានផ្គត់ផ្គង់ជូនទេ ព្រោះលោកមានហាងលក់ដោយខ្លួនឯងនៅភ្នំពេញ ដោយមានច្រើនសាខាផងដែរ មានឈ្មោះថាពិភពបន្លែផ្លែឈើ ខេត្តមណ្ឌលគិរី ។
លោក រ៉ាដូ ចែករំលែកបន្តថា ការដាំដំណាំល្ហុងហូឡេនក៏ជួបផលលំបាកច្រើនដែរ ដូចជាបញ្ហាអាកាសធាតុ និងជំងឺរបស់វា ក៏ប៉ុន្តែដោយលោកបានស្រាវជ្រាវឯកសារនានាពីកសិកម្ម និងមានគ្រូបច្ចេកទេសផ្នែកកសិកម្មពិភាគក្សាផងនោះ ទើបលោកអាចរកវិធីទប់ទល់ហានិភ័យផ្សេងៗបាន និងឈានដល់ភាពជោគជ័យមួយ ក្នុងដាំដុះនិងនាំចេញទិន្នផលល្ហុងហូឡេនទៅទីផ្សារខាងក្រៅ ។ (មានសម្លេង)
កសិករដដែលបានបន្ថែមថា ល្ហុងហូឡេនដែលលោកដាំ បានប្រើជីមួយចំនួនដើម្បីបំប៉ន់ផងដែរ ប៉ុន្តែលោកសូមធានាថា មានសុវត្ថិភាពចំពោះការបរិភោគ១០០% ។ ហើយល្ហុងប្រភេទនេះ គិតចាប់ពីថ្ងៃដាំដុះរហូតទទួលបានផល មានរយៈ៨ខែ ប្រសិនថែទាំដិតដល់ និងប្រើពេល១០ខែក្នុងករណីថែទាំមិនសូវដិតដល់។ ល្ហុងហូឡេនលើផ្ទៃដី៤ហិកតា ស្មើនិង៤៤០០ដើម អាចប្រមូលបានប្រមាណ១៥ថ្ងៃ ក្នុង១ខែ ហើយក្នុងការប្រមូលម្ដង អាចបានផល១តោន ទៅ១តោន ២០០គីឡូក្រាម ដោយចំនួននេះនៅតួចៗនៅឡើយព្រោះល្ហុងទើបទុំបានខ្លះៗ ប្រសិនរងចាំដល់ល្ហុងទុំស្រុះគ្នា អាចប្រមូលម្ដងបាន២ទៅ៣តោនឯណោះ ។
លោក ម៉ុយ រ៉ាដូ បញ្ជាក់ថា ល្ហុងហូឡេន របស់លោកលក់បោះដុំ ១គីឡូក្រាម ២៥០០៛ ចំណែកអ្នកយកលក់បន្ត លក់រាយ ១គីឡូក្រាម ៦០០០៛ ។ បច្ចុប្បន្នលោកមានទីផ្សារធំគឺផ្គត់ផ្គង់ទៅភ្នំពេញ ដោយលោកមានហាងច្រើនសាខា មានឈ្មោះថា ពិភពបន្លែផ្លែឈើខេត្តមណ្ឌលគិរី និងទីផ្សារផ្សេងទៀតគឺក្នុងខេត្តមណ្ឌលគិរី ក្រចេះ រតនគិរី និងសៀមរាបជាដើម ប៉ុន្តែផ្គត់ផ្គង់មិនគ្រប់តម្រូវការនោះទេ ។ ចំណុចពិសេសរបស់ល្ហុងហូឡេន គឺសាច់ល្ហុងហាប់ណែន ផ្អែម ខុសពីល្ហុងធម្មតា ដែលមានសភាពទន់ជ្រាយ មិនផ្អែម ។
ប្រធានមន្ទីរកសិកម្មរុក្ខាប្រមាញ់និងនេសាទខេត្តមណ្ឌលគិរី លោក សុង ឃាង បញ្ជាក់ថា ដំណាំល្ហុងនៅខេត្តមណ្ឌលគិរី មានដាំដុះលើផ្ទៃដីតិចតួចប៉ុណ្ណោះ។