ភ្នំពេញ៖ ក្រុមទីភ្នាក់ងារអង្គការសហប្រជាជាតិប្រចាំកម្ពុជា ដឹកនាំដោយអ្នកសម្របសម្រួលអង្គការសហប្រជាជាតិប្រចាំនៅកម្ពុជា លោក ចូ សូយ័រ បានចូលជួបសម្តែងការគួរសម និងពិភាក្សាការងារមួយចំនួនជាមួយនាយករដ្ឋមន្ត្រីកម្ពុជា សម្តេចតេជោ ហ៊ុន សែន នារសៀលថ្ងៃទី២៨ ខែមីនា ឆ្នាំ២០២៣ នៅវិមានសន្តិភាព។

ឯកឧត្តម អ៊ាង សុផល្លែត ជំនួយការសម្ដេចតេជោ បានបញ្ជាក់ឱ្យដឹងថា នៅក្នុងកិច្ចជំនួបនោះ ភាគីទាំងពីរបានផ្តោតលើការយកចិត្តទុកដាក់លើប្រធានបទចំនួន២ ដោយទី១ គឺការកំណត់ទិសដៅ និងការគាំទ្ររបស់អង្គការសហប្រជាជាតិដល់ទិសដៅអាទិភាពរបស់រាជរដ្ឋាភិបាលក្នុងការពង្រឹងប្រព័ន្ធសុខាភិបាលប្រកបដោយភាពធន់ ដើម្បីឈានឆ្ពោះការគ្របដណ្តប់សុខភាពជាសកល។

ប្រធានបទទី២ គឺការពង្រឹងប្រព័ន្ធការពារសង្គម ដោយបែងចែកជា២ គឺផ្នែកទី១ ការកំណត់ ទិសដៅជាអាទិភាពរបស់រដ្ឋាភិបាលក្នុងការអភិវឌ្ឍ និងការពង្រីកការគ្របដណ្តប់ការគាំពារសង្គមដែលគាំពារប្រជាពលរដ្ឋ ជនក្រីក្រ និងជនងាយរងគ្រោះហានិភ័យផ្សេងៗ និងវិបត្តិផ្សេងៗ។ ផ្នែកទី២ ការគាំទ្ររបស់អង្គការសហប្រជាជាតិដល់ទិសដៅអាទិភាពរបស់រាជរដ្ឋាភិបាលដើម្បីអភិវឌ្ឍបន្ថែមទៀតនូវប្រព័ន្ធគាំពារសង្គម។

សម្តេចតេជោបានសន្និដ្ឋានថា ប្រព័ន្ធអង្គការសហប្រជាជាតិបានប្រកាន់ខ្ជាប់នូវភាពទន់ភ្លន់ និងបត់បែនតាមសភាពការណ៍ក្នុងអភិវឌ្ឍ UNDAF តាមរយៈដាក់ឱ្យអនុវត្តក្របខណ្ឌឆ្លើយតបសង្គមសេដ្ឋកិច្ច និងពិនិត្យកែសម្រួលមូលធន និងគោលដៅអន្តារាគមន៍ឡើងវិញសំដៅគាំទ្ររាជរដ្ឋាភិបាល ក្នុងការកាត់បន្ថយភាពប៉ះពាល់នៃជំងឺរាតត្បាតមកលើក្រុមងាយរងគ្រោះបំផុត។ ទន្ទឹមនេះ ក៏បានកៀរគរធនធានថ្មីបន្ថែមសម្រាប់គាំទ្ររាជរដ្ឋាភិបាលក្នុងការឆ្លើយតបនឹងតម្រូវការផ្នែកសុខភាព និងការស្តារសង្គមសេដ្ឋកិច្ចឡើងវិញ។

សម្តេចបានថ្លែងថា អ្វីដែលគួរឱ្យអបអរសាទរ និងកោតសរសើរគឺការសម្រេចបាននូវវឌ្ឍនភាពជាវិជ្ជមានលើលទ្ធភាពរំពឹងទុកជាយុទ្ធសាស្ត្រទាំង៥ របស់ UNDAF នៅក្នុងកាលៈទេសៈដ៏សែនលំបាក។ ទាំងនេះអាចបញ្ជាក់បានពីកិច្ចប្រឹងប្រែងអនុវត្តរួមគ្នារវាងភ្នាក់ងារទាំងអស់នៃប្រព័ន្ធអង្គការសហប្រជាជាតិ និងកិច្ចសហការដ៏ល្អប្រពៃក្នុងភាពជាដៃគូរឹងមាំ ជាមួយក្រសួង និងស្ថាប័ន។

រីឯការរៀបចំក្របខណ្ឌកិច្ចសហប្រតិបត្តិការ ការអភិវឌ្ឍប្រកបដោយចីរភាព នៃប្រព័ន្ធអង្គការសហប្រជាជាតិ ឆ្នាំ២០២៤-២០២៨ សម្តេចតេជោក៏បានថ្លែងថា មានវឌ្ឍនភាពល្អប្រសើរតាមរយៈកិច្ចពិគ្រោះយោបល់ក្នុងភាពជាដៃគូប្រកបដោយបរិយាប័ន្ន។

សម្តេចតេជោបានលើកទឹកចិត្តឲ្យភាគីពាក់ព័ន្ធបន្តកិច្ចសហការដើម្បីឈានទៅបញ្ចប់ ក្របខ័ណ្ឌកិច្ចសហប្រតិបត្តិការអភិវឌ្ឍន៍ប្រកបដោយចីរភាពនៃប្រព័ន្ធអង្គការសហប្រជាជាតិនេះតាមការគ្រោងទុកនាខែឧសភា ឆ្នាំ២០២៣ សម្រាប់ជាក្របខ័ណ្ឌកិច្ចសហប្រតិបត្តិការសំខាន់សម្រាប់រយៈពេល៥ឆ្នាំខាងមុខឆ្នាំ២០២៤-២០២៨។

សម្តេចតេជោបានស្នើឲ្យភ្នាក់ងារពាក់ព័ន្ធនៃប្រព័ន្ធអង្គការសហប្រជាជាតិបន្តរៀបចំកម្មវិធីយុទ្ធសាស្ត្ររៀងៗខ្លួនតាមយន្តការកិច្ចពិគ្រោះយោបល់ដែលមានស្រាប់។ សម្តេចបញ្ជាក់ថា រាជរដ្ឋាភិបាលនឹងផ្តល់ការគាំទ្រជាផ្លូវការលើឯកសារទាំងនេះសម្រាប់ជាមូលដ្ឋានក្នុងការពិនិត្យ និងអនុម័តក្នុងអង្គប្រជុំរបស់ក្រុមប្រឹក្សាប្រតិបត្តិ។

ចំពោះប្រធានបទស្តីពីការពង្រឹងប្រព័ន្ធសុខាភិបាលប្រកបដោយភាពធន់ឆ្ពោះទៅការគ្របដណ្តប់សុខភាពជាសកលនិងពង្រីកប្រព័ន្ធគាំពារសង្គម កិច្ចពិភាក្សាបានបង្កើនការយល់ដឹងរួមគ្នាអំពីវឌ្ឍនភាពបញ្ហាប្រឈម គោលដៅជាយុទ្ធសាស្ត្ររបស់រដ្ឋាភិបាលក្នុងវិស័យអាទិភាពទាំងពីរនេះដែលជាមូលដ្ឋានស្នូលនៃការអភិវឌ្ឍធនធានមនុស្សហើយដែលនឹងត្រូវរំលេចចេញ លម្អិតក្នុងយុទ្ធសាស្ត្របញ្ចកោណដំណាក់កាលទីមួយ។

លើសពីនេះ សម្ដេចតេជោសម្ដែងក្ដីរីករាយចំពោះការប្ដេជ្ញាចិត្តរបស់ប្រព័ន្ធអង្គការសហប្រជាជាតិដែលបន្តគាំទ្ររាជរដ្ឋាភិបាលក្នុងការពង្រឹងប្រព័ន្ធសុខាភិបាលប្រកបដោយភាពធន់ឆ្ពោះទៅការគ្របដណ្តប់សុខភាពជាសកល និងពង្រីកប្រព័ន្ធគាំពារសង្គមក្នុងគោលដៅការអភិវឌ្ឍសង្គមសេដ្ឋកិច្ចកម្ពុជាប្រកបដោយភាពធន់ចីរភាពនិងបរិយាប័ន្ន។

សម្តេចតេជោបានជំរុញលើកទឹកចិត្តឲ្យក្រសួងស្ថាប័នពាក់ព័ន្ធនានានៃរាជរដ្ឋាភិបាលបន្តធ្វើការងារនេះឲ្យកាន់តែជិតស្និទ្ធថែមទៀតជាមួយភ្នាក់ងារនៃប្រព័ន្ធអង្គការសហប្រជាជាតិដើម្បីប្រែក្លាយការប្ដេជ្ញាចិត្តនិងការគាំទ្រទាំងនេះឲ្យទៅជាសកម្មភាពជាក់ស្ដែង។

សម្តេចតេជោបានវាយតម្លៃខ្ពស់ចំពោះការគំាទ្រទាំងឡាយដែលពាក់ព័ន្ធអង្គការសហប្រជាជាតិបានផ្តល់កន្លងមកសម្រាប់ រួមចំណែកអភិវឌ្ឍសង្គមសេដ្ឋកិច្ចកម្ពុជា៕