ខេត្តក្រចេះ៖ បញ្ហាទំនាស់ដីធ្លីរវាងបងប្អូនបង្កើត គឺឈ្មោះ តែ លន់ , តែ ហ៊ង និងឈ្មោះ តែ គាវ រស់នៅភូមិដីថ្មី ឃុំព្រែកសាហ្ម៉ន់ ស្រុកឆ្លូង ខេត្តក្រចេះ បានអូសបន្លាយអស់រយៈពេលជាច្រើនឆ្នាំមកហើយ រហូតឈានដល់ការប្តឹងផ្តល់គ្នាយកឈ្នះចាញ់រៀងៗខ្លួនទៀតផង។

ដោយសារតែរឿងទំនាស់ក្នុងគ្រួសារត្រកូលខាងលើនេះក្លាយទៅជាជំងឺរ៉ាំរ៉ៃមិនអាចរកចំណុចបញ្ចប់បាន ទើបនៅព្រឹកថ្ងៃទី២១ ខែមិថុនា ឆ្នាំ២០២៣ លោក ហេង សុថា អភិបាលរងខេត្ត តំណាងឯកឧត្តម វ៉ា ថន អភិបាលនៃគណៈអភិបាលខេត្តក្រចេះ បានចុះធ្វើការដោះស្រាយ និងសម្របសម្រួល ដើម្បីបញ្ចប់បញ្ហាទំនាស់មួយនេះដែលមានការរៀបចំនៅឯសាលាស្រុកឆ្លូង និងមានការចូលរួមពី លោកស្រី គង់ លឹមហួរ អភិបាលស្រុកឆ្លូង , លោក ធីម ស៊ាងឡេង អភិបាលរងស្រុក រួមនិងមន្ត្រីជំនាញផងដែរ។

លោក ហេង សុថា បានបញ្ជាក់ថា ការដោះស្រាយនេះ មិនមែនកាត់ក្តីឲ្យខាងភាគីណាមួយឈ្នះ ឬចាញ់នោះទេ ប៉ុន្តែចង់ឲ្យពួកគាត់ធ្វើការដោះស្រាយគ្នាក្រៅប្រព័ន្ធតុលាការ ដោយមិនមានការចំណាយទុនអ្វីទាំងអស់ តាមការសម្រេចចិត្តល្អៗពីភាគីទាំងសងខាង នេះបើពួកគាត់ទម្លាក់ចិត្តរៀងៗខ្លួន ដើម្បីរកចំណុចកណ្តាល និងគោលការណ៍រួមឈ្នះឈ្នះទាំងអស់គ្នា ពិសេសចង់ឲ្យក្រុមគ្រួសារត្រូវចេះស្រលាញ់គ្នា គោរពគ្នាទៅវិញទៅមក ក្នុងត្រកូលគ្រួសារតែមួយ។

លោក ហេង សុថា បានមានប្រសាសន៍ជំរុញដល់ទឹកចិត្តកូនៗ ចេះបន្ទន់ឥរិយាបថ និងជួយផ្តល់យោបល់ជូន អ្នកម្តាយ លោកឪពុក នូវចំណុចល្អៗ ជាការសម្រាលនូវទុក្ខកង្វល់បញ្ហាទំនាស់ប្រកបដោយប្រសិទ្ធភាព និងទុកអារម្មណ៍ល្អៗសម្រាប់កូនៗបន្តជំនាន់ទៅថ្ងៃក្រោយ។

លោកអភិបាលរងខេត្តបញ្ជាក់បន្ថែមថា លោកមិនអាចកាត់ក្តីឲ្យភាគីណាឈ្នះ ឬចាញ់នោះទេ ហើយក៏មិនមានសិទ្ធិកាត់ក្តីរំលោភលើសាលក្រមតុលាការដែរ គ្រាន់តែមានសិទ្ធិសម្របសម្រួលក្នុងនាមអាជ្ញាធរគ្រប់គ្រងមូលដ្ឋាន ពោលចង់ឲ្យបងប្អូនចេះស្រលាញ់គ្នា សាមគ្គីគ្នា និងចេះយោគយល់អធ្យាស្រ័យឲ្យគ្នាទៅវិញទៅមកក្នុងគ្រួសារ និងត្រកូលតែមួយប្រកបដោយភក្តីភាព។

សូមបញ្ជាក់ថា ទោះយ៉ាងណា ការដោះស្រាយខាងលើនេះ មិនទាន់ទទួលបានលទ្ធផលនូវឡើយទេ ដោយសាតែភាគីខាងចុងចម្លើយ គឺឈ្មោះ តែ គាវ មិនបានចូលរួមធ្វើការដោះស្រាយ សម្របសម្រួល តាមការអញ្ជើញរបស់អាជ្ញាធរឡើយ៕