ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសប្រាប់សមាជិកក្រុមប្រឆាំងមួយចំនួន ក្នុងក្រុមតេឡេក្រាម «Sabai សប្បាយ»​ ដែលបានគូសខ្វែងសន្លឹកឆ្នោត ហើយផ្ញើទៅកាន់មេរបស់ខ្លួននៅបារីស ចេញមុខសារភាព មុនពេលដែលវិធានការច្បាប់ត្រូវបានប្រកាន់យក។

សម្តេចតេជោបានបញ្ជាក់ថា កាលពីយប់មិញសម្តេចបានចូលទៅ Comment ក្នុងឆាណែលតេឡេក្រាមឈ្មោះ «Sbai សប្បាយ» ដោយសម្តេចតេជោបានបញ្ជាក់ថា បានស្គាល់មុខសញ្ញាអ្នកទាំងនោះដែលមានមូលដ្ឋានរស់នៅក្នុងប្រទេសកម្ពុជា។

សម្តេចតេជោបានបញ្ជាក់ថា៖ «ខ្ញុំសូមជម្រាបជូនខាងក្រុមប្រឆាំងឱ្យបានជ្រាបថា យប់មិញនេះអស់លោកបានដំណើរការនូវឆាណែលតេឡេក្រាម (Sbai សប្បាយ) ដើម្បីឱ្យមានការលើកទឹកចិត្តឱ្យមានការគូសសន្លឹកឆ្នោតចោល ដោយមានសេចក្តីក្លាហាន បញ្ជូនសន្លឹកឆ្នោតនោះទៅកាន់មេដឹកនាំនៅទីក្រុងបារីស»។

សម្តេចតេជោបានបញ្ជាក់បន្ថែមថា អ្នកទាំងនោះអាចចេញមុខមកសារភាពជាមួយនឹងអាជ្ញាធរនៅជិតមូលដ្ឋាន និងនៅចំពោះមុខគណៈកម្មាធិការជាតិរៀបចំការបោះឆ្នោត ដែលសម្តេចបានថ្លែងថា៖ «អ្នកមិនអាចលាក់នូវអ្វីដែលជាការប៉នប៉ងបំផ្លាញរបស់អ្នកនោះទេ ហើយសូមអ្នកទាំងឡាយដែលមានការពាក់ព័ន្ធកុំរត់ចោលស្រុកអី សូមប្រញាប់ចេញមកសារភាពទទួលយកនូវកំហុសដែលខ្លួនប្រព្រឹត្តតាមមេដឹកនាំជាឧទ្ទាមក្រៅច្បាប់»។

សម្តេចតេជោ បានណែនាំដល់គណៈកម្មាធិការជាតិរៀបចំការបោះឆ្នោតបែងចែកឱ្យដាក់នូវសន្លឹកឆ្នោតដែលបានការ ជាមួយសន្លឹកឆ្នោតដែលបានគូសខ្វែង ខណៈមានសន្លឹកឆ្នោតសរុបចំនួន ៨ ១៧៧ ០៥៣សន្លឹកដែលមាននៅក្នុងហិបបោះឆ្នោតថ្ងៃអាទិត្យនេះ។

បើតាមសម្តេចតេជោ ចំនួនប្រជាជនទៅបោះឆ្នោតនៅអាណត្តិទី៧ ឆ្នាំ២០២៣នេះ បើប្រៀបធៀបចំនួនប្រជាជនទៅបានចេញទៅបោះឆ្នោតកាលពីមានវត្តមានរបស់គណបក្សភ្លើងទៀនចូលរួម គឺលើកនេះប្រជាជនមានច្រើនលើសលុប ច្រើនជាងកាលពីមានគណបក្សភ្លើងទៀន។ សម្តេចតេជោ នាយករដ្ឋមន្ត្រីថាលោកនឹងទន្ទឹងរង់ចាំមើលចំនួនសន្លឹកឆ្នោតដែលគូសខ្វែងដោយក្រុមបក្សប្រឆាំង តើប៉ុន្មានសន្លឹក ខណៈក្រុមបក្សប្រឆាំងថាសន្លឹកឆ្នោតដែលគូសខ្វែងនោះគឺជាសន្លឹកឆ្នោតដែលគាំទ្រដល់ពួកគេ។

តាមរបាយការណ៍របស់សមត្ថកិច្ច បានឱ្យដឹងថា បន្ទាប់ពីស្រាវជ្រាវលើករណីញុះញង់បំផ្លាញការបោះឆ្នោត ដែលរៀបចំដោយទណ្ឌិត សម រង្ស៉ី នៅពេលនេះ សមត្ថកិច្ចជំនាញ បានរកឃើញមុខសញ្ញា ដែលធ្វើសកម្មភាពញុះញង់បំផ្លាញការបោះឆ្នោតជាមួយទណ្ឌិត សម រង្ស៉ី តាមរយៈក្រុមតេលេក្រាម «Sabai សប្បាយ» ចំនួន៤០នាក់ហើយ ដែលអ្នកទាំងនោះប្រឈមនឹងការផ្តន្ទាទោសតាមច្បាប់ និងការផាកពិន័យជាប្រាក់ផងដែរ ខណៈសមត្ថកិច្ចកំពុងតែប​ន្តស្រាវជ្រាវថែមទៀត៕