ខេត្តមណ្ឌលគិរី ៖ ក្រសួងបរិស្ថាន សហការជាមួយរដ្ឋបាលខេត្តមណ្ឌលគិរី បានប្រារព្ធទិវាមន្ត្រីឧទ្យានុរក្សកម្ពុជាឆ្នាំ២០២៥ នៅដែនជម្រកសត្វព្រៃកែវសីមា ខេត្តមណ្ឌលគិរី កាលពីថ្ងៃទី១៥ ខែសីហា ឆ្នាំ២០២៥ ក្រោមអធិបតីភាព ឯកឧត្តម សុខខេង នវិន្ទ អនុរដ្ឋលេខាធិការក្រសួងបរិស្ថាន ដើម្បីរំលឹកដល់ការលះបង់ដ៏ថ្លៃថ្លារបស់មន្ត្រីឧទ្យានុរក្ស ក្នុងការការពារ និងអភិរក្សធនធានធម្មជាតិ។ ពិធីនេះមានការចូលរួមពីថ្នាក់ដឹកនាំ មន្ត្រីរាជការនៃរដ្ឋបាលថ្នាក់ក្រោមជាតិ តំណាងស្ថាប័នពាក់ព័ន្ធ អង្គការដៃគូអភិវឌ្ឍន៍ ភ្ញៀវជាតិ និងអន្តរជាតិ រួមទាំងប្រជាសហគមន៍ជាច្រើនរូប។

ឯកឧត្តម សុខខេង នវិន្ទ បានថ្លែងថា ការប្រារព្ធទិវានេះ ត្រូវនឹងខួបលើកទី១៨ នៃទិវាមន្ត្រីឧទ្យានុរក្សពិភពលោក ដែលមានគោលបំណងសំខាន់ៗពីរ៖ ១. លើកទឹកចិត្ត និងពង្រឹងសមត្ថភាព ដល់មន្ត្រីឧទ្យានុរក្សក្នុងការបំពេញបេសកកម្មការពារបរិស្ថាន និងធនធានធម្មជាតិប្រកបដោយប្រសិទ្ធភាព។ ២. បង្កើនការយល់ដឹង ដល់សាធារណជនអំពីតួនាទីរបស់មន្ត្រីឧទ្យានុរក្ស ដើម្បីជំរុញការចូលរួមសហការពីគ្រប់ភាគី។ ឯកឧត្តម បានបន្តថា ក្រោមម្លប់សន្តិភាពពេញលេញ និងការដឹកនាំដ៏ត្រឹមត្រូវរបស់រាជរដ្ឋាភិបាល តាមរយៈយុទ្ធសាស្ត្រនានា កម្ពុជាមានស្ថិរភាពម៉ាក្រូសេដ្ឋកិច្ចរឹងមាំ។ ក្រសួងបរិស្ថាន បាននិងកំពុងធ្វើកំណែទម្រង់ទំនើបកម្ម និងឆ្ពោះទៅរដ្ឋបាលឌីជីថល ក្នុងនោះការគ្រប់គ្រងតំបន់ការពារធម្មជាតិត្រូវបានបង្កើនប្រសិទ្ធភាព។ បច្ចុប្បន្ន តំបន់ការពារធម្មជាតិបានកើនឡើងដល់ ៧៣ កន្លែង ដែលមានផ្ទៃដីសរុបជាង ៧ លានហិកតា ស្មើនឹងជិត ៤០% នៃផ្ទៃដីសរុបរបស់ប្រទេស។

លោក ងិន សុវិមាន អភិបាលរងខេត្តមណ្ឌលគិរី បានថ្លែងស្វាគមន៍ និងសម្ដែងការដឹងគុណយ៉ាងជ្រាលជ្រៅបំផុតចំពោះមន្ត្រីឧទ្យានុរក្សទាំងអស់ដែលបំពេញការងារនៅជួរមុខនៃការអភិរក្ស។ លោកបានបញ្ជាក់ថា ខេត្តមណ្ឌលគិរីសម្បូរទៅដោយធនធានធម្មជាតិ ហើយតំបន់ការពារធម្មជាតិមានសារៈសំខាន់ខ្លាំងណាស់ក្នុងការអភិវឌ្ឍ និងលើកកម្ពស់ជីវភាពសហគមន៍មូលដ្ឋាន។

លោក អាលីសស្ទែរ ម៉ូលដ៍ នាយកអង្គការ WCS បានថ្លែងគោរព និងដឹងគុណចំពោះភាពក្លាហាន និងការលះបង់ដ៏ធំធេងរបស់មន្ត្រីឧទ្យានុរក្សកម្ពុជា។ លោក បានសន្យាថា អង្គការរបស់លោកនឹងបន្តឈរជាមួយ និងគាំទ្រមន្ត្រីឧទ្យានុរក្សជារៀងរាល់ថ្ងៃ។

នាឱកាសនោះ អ្នកចូលរួមទាំងអស់ក៏បានស្វែងយល់ពីការងាររបស់មន្ត្រីឧទ្យានុរក្សក្នុងការការពារ និងអភិរក្សធនធានធម្មជាតិ ហើយបានចូលរួមដាំកូនឈើជាច្រើនដើមនៅដែនជម្រកសត្វព្រៃកែវសីមាផងដែរ៕